Atualità
Adatamënt dla reforma scolastica: Sëra d'informaziun a Urtijëi
La pröma incuntada d’informaziun sön l’adatamënt dla reforma scolastica statala “La Buona Scuola” ala normativa provinziala y les novités por le sistem scolastich ladin é gnüda tignida inier jöbia, ai 03 de dezëmber, a Urtijëi.
Inier, jöbia ai 03 de dezëmber, él gnü tigní a Urtijëi la pröma dles döes sëres d’informaziun y discusciun dal titul „La reforma nazionala dla scora (lege 107/2015, “La Buona Scuola”), so adatamënt ala normativa provinziala y les novités por le sistem scolastich ladin“. Tratan la sëra él gnü porté dant les novités prinzipales che reverda l’adatamënt nezesciar dl cheder legislatif provinzial ala reforma statala. Do l’aprovaziun dla lege „La Buona Scuola“ da pert dl Parlamënt ai 9 de messé dl 2015 mëss la normativa nöia sëgn gní adatada ales desposiziuns provinziales tl setur dla scora.
La lege 107/2015 se tol dant de amplié l’autonomia dles scores cun la definiziun de n plann trienal dl’oferta formativa, de renforzé l’ativité de ajornamënt di insegnanc y de potenzié les competënzes di direturs y dles direturies dles scores. Na pert dles novités reverda la pert didatica, danter l’ater la poscibilité da adoré personal spezialisé tles scores elementares, por ejëmpl por les materies de sport, musiga y inglesc, aziuns cuntra l’arbandonn scolastich y l’introduziun de n portfolio personal de vigni studënt por documenté le percurs scolastich.
Tratan la sëra él gnü sotligné che le sistem formatif ladin é bele da tröc agn “na buna scora”, ince por merit al gran impëgn che döt le personal scolastich mostra sö de por de te so laur. Al é ince gnü fora tler che les scores ladines é comunités davertes che desmostra interes por les inovaziuns y le svilup dla cualité dl insegnamënt. Tröpes insegnantes y tröc insegnanc á tut pert al’incuntada y s'á damané stlarimënc en cunt dl’atuaziun dla lege 107 a livel provinzial, jon ite sön dötes les componëntes dla scora: direturs, insegnanc, geniturs, studënc y personal dl’aministraziun y de sorvisc. Al é sté na sëra de dialogh davert y costrutif.
L’assessur Florian Mussner á sotligné che chëstes incuntades de informaziun fej pert de n dialogh costant cun i rapresentanc dl monn dla scora, „por informé sön les chestiuns atuales che reverda la legislaziun y le svilup dla didatica y organisaziun tles scores de nostes valades ladines.“ L’intendënt Roland Verra á recordé che l’obietif de chësta scomenciadia é da „porté adöm dötes les componëntes dl monn dla scora, dai insegnanc ai geniturs y i rapresentanc di scolars, por informé y fá propostes d’integraziun che reverda le dessëgn de lege nü“. Sëgn gnarál valuté la poscibilité de integré les domandes y propostes tl percurs de formaziun dla lege provinziala nöia.
La secunda sëra de discusciun y informaziun sará en jöbia, ai 10 de dezëmber dales 20:00 tl Istitut Ladin “Micurá de Rü" a San Martin de Tor. La moderaziun sará de Lois Kastlunger la partezipaziun vëgn reconesciüda sciöche ativité de formaziun dl personal dles scores y scolines.
rc
