Atualità
En sorvisc de scora y patria: Presenté le liber de Eduard Pizzinini
Inier, domënia ai 06 de dezëmber, él gnü presenté a Al Plan l'autobiografia de Eduard Pizzinini, personalité conesciüda tl Comun de Mareo y surafora. Sües recordanzes pó sëgn gní lites do tl liber nü „na vita al sorvisc dla scora y dal paisc“ dé fora dal Ciamp Inovaziun y Consulënza dl Departimënt Educaziun y Cultura ladina.
Cöi adöm les esperiënzes y recordanzes de porsones dër conesciüdes y aprijiades tles valades ladines é un di fins prinzipai dla ligna de piceres publicaziuns dades fora dal Ciamp Inovaziun y Consulënza. Do la pröma publicaziun realisada da Franz Vittur, intendënt da denant, él inier (06 de dezëmber) gnü presenté l'autobiografia de Eduard Pizzinini dal titul „na vita al sorvisc dla scora y dal paisc“.
Eduard Pizzinini é aldedaincö con sü 93 agn öna dles porsones plü inant cun l'eté tl Comun de Mareo, al á insegné tla scora elementara, spo él passé ala scora mesana y é gnü so diretur cina che al é jü en ponsiun l’ann de scora 1988/89. De gran fostüs ál ince lascé tal ciamp dla musiga y dal cianté, no ma te so paisc d’adoziun, mo te döta la valada: al é sté ciantadú y dirighënt de engröm de cors y ince por valgügn agn dirighënt dla musiga d’Al Plan. Le cor de dlijia ál manajé 43 agn alalungia.
La presentaziun é gnüda organisada dal diretur dl Ciamp Inovaziun y Consulënza Felix Ploner, tröpes é stades les autorités presëntes cun danter l'ater l'assessur ladin Florian Mussner, l'ombolt Albert Palfrader, le diretur dles scores tl raiun de Mareo Otto Moling y le presidënt dl Istitut Ladin Albert Videsott. La cornisc musicala dla festa é stada chëra dl Cor di Ëi d'Al Plan. La publicaziun nöia é gnüda dada fora en colaboraziun cun l'assoziaziun culturala "Mareo laota y incö". Por plü informaziuns: pedagogich.it.
rc
Galaria dales fotografies
