Atualità
Formaziun musicala dles educadësses dles scolines: Surandada di zertificac
Stlüta jö na formaziun musicala de 2 agn y 13 modui y 8 laboratori por 15 educadësses dla scolina organisada dal Ciamp inovaziun & consulënza en colaboraziun cun l’Ispetorat y la Direziun dles scolines por se cualifiché por l’educaziun musicala por mituns y mitans dai 3 ai 6 agn.
Indöt 15 educadësses dla scolina de Gherdëna y dla Val Badia á podü pié do ai 14 de dezëmber tla scolina Salieta a Urtijëi dal Intendënt Roland Verra zertificac de partezipaziun de na scoraziun de formaziun musicala por mitans y mituns dla scolina.
“La formaziun che porta le plü é aladô de inrescides chëra che döra plü dî y olache al vëgn imparé y porvé fora cosses nöies tl grup” á dit te chësta ocajiun la ispeturia Edith Ploner. Da agost dl 2013 cina de novëmber dl 2015 á doré na seria de cursc por abilité les educadësses da ti porté pormez “la musiga sciöche lingaz universal y dl cör, sciöche lingaz arcaich y original” aladô dles parores dl intendënt Roland Verra. “Ascuté sö musiga é saurí, soné bun n stromënt se damana n gran impëgn”, á dit le diretur dl Ciamp inovaziun y consulënza Felix Ploner, che á sotrissé l’importanza dla musiga che acompagnëia tres les staziuns dla vita y che dëida formé la porsona da düc i punc de odüda.
Le fin de chësta formaziun musicala plü lungia é sté chël de porté ite düc i elemënc de importanza por imposté unités de educaziun musicala che tol ite l’educaziun al sonn y al ascuté sö, le ritm, le movimënt, le lingaz y la creativité en general por podëi programé “unités de educaziun musicala” che vá sura le cianté na ciantia o fá n bal fora. Ince la costruziun y se fá instësses stromënc musicai y savëi da i adoré é stada na pert dla formaziun.
Te 8 laboratori musicai pitá dales cater espertes cun na formaziun musicala universitara Miriam Ester Costabiei, Valentina Fontanella, Silvia Mussner y Valeria Pescollderungg daverc ince a d’atres partezipantes, él gnü aprofondí tematiches y lauré concretamënter sön singoles perts dl’educaziun musicala di pici.
La surandada di zertificac á orü ester n momënt de valorisaziun y de festa por n proiet porté bun a fin, olache al é gnü investí almanco 20 dis de vacanza te bun dui agn da pert dles educadësses che á tut pert. Bëgn set é stá i referënc y les referëntes che á porté ite so savëi y süa esperiënza tl’educaziun musicala di pici danter 3 y 6 agn: Margarita Frischauf de Oberösterreich, Claudia Zadra y Francesco Brazzo da Balsan, Franz Comploj dl’Université da Porsenú, Elita Maule dl Conservatore da Balsan, Max Castlunger da San Martin y la pert prinzipala da pert de Esther Videsott da Picolin che vir y laora sëgn a Minca y che s’á ince spezialisé, dlungia so diplom dl conservatore, tla formaziun musicala di mëndri.
“La musiga á na gran importanza por le svilup dla personalité dl möt/dla möta. La musiga y le movimënt á ince na faziun positiva sön le svilup linguistich y influenzëia la cosciënza dl corp. Da esperimenté cun la usc, cun i sonns y cun i materiai descür i mituns/les mitans le monn dla musiga y ativëia dantadöt le sëns dl aldí. La varieté de perzeziuns sensoriales stimolëia la creativité y ti deura les portes a de vigni sort de formes de espresciun ”, á recordé la direturia Hannelore Insam zitan les indicaziuns provinziales dla scolina che reverda le ciamp dl’educaziun musicala.
La cornisc musicala á les partezipantes ai cursc sambëgn instësses pité desmostran insciö na pert de ci che ares á podü imparé y che ares podará sëgn dé inant ai pici.
Chëstes les educadësses che á ciafé l’atestat de partezipaziun ala formaziun musicala: Bauer Renate, Dasser Wilma, Ferdigg Christine, Insam Alexandra, Insam Dagmar, Irsara Margareth, Moroder Elisabeth, Obojes Angela, Perathoner Karin, Pezzei Monica, Prinoth Michela, Quitta Evelyn, Runggaldier Rosmarie, Runggaldier Valeria, Senoner Rosa.
OSP
