Atualità
Furmazion y didatica: Mussner y Verra tla scola elementera a Urtijëi
L’elaburazion de material de nseniamënt adatà, la furmazion permanënta dla maestres y di maestri y la ndesfidedes tla scoles elementeres ladines ie states la tematiches zentreles de chëles che l assessëur Florian Mussner y l intendënt dla scoles Roland Verra à rujenà n ch’sta dì cun la diretëura Maria Kostner tla scola elementera de Urtijëi.
“Iust te na sozietà te chëla che l vën rujenà de plu rujenedes ie la scola elementera na piera miliera de mpurtanza per l svilup de uni muta y mut”, à dit l assessëur ladin. “Al nseniamënt tla trëi rujenedes dla provinzia, ala furmazion permanënta tla metodica y didatica, ala ntlujion y al svilup de uni sculé y sculea iel da dé na mpurtanza particulera”, nsci Mussner. Per pudëi se rënder cont dla truepa funzions y di truep duvieres che la maestres à al didancuei n chësc cont ie l assessëur Florian Mussner y l intendënt dla scoles ladines Roland Verra unic a fé na vijita tla scola elemtera de Urtijëi. “L gran mpëni dla maestres y la mutivazion dla sculees y di sculeies mostra che la scola ie na luegia d’ancunteda ulache la cumenanza dla scola se n sta bën y ulache l ne vën nia mé tramandà savëi ma nce valores” à sotrissà Mussner. Ël à po nce laudà la gran despunibltà dla maestres de se ajurné for inant per ti garantì ala sculees y ai sculeies la miëura furmazion puscibla.
Ntan la vijita dla tlasses à la diretëura Kostner purtà dant n valgunes dla nuviteies plu mpurtantes: “Tl ciamp dla didatica y dla metodica se à ti ultimi ani mudà truep sciche p.ej. la ntroduzion dl’alfabetisazion tla trëi rujenedes y la realisazion de n nseniamënt nzentrà sun la sculees y i sculeies.“Aldò dla diretives cheder messëssa la scola defati ti dé a duta la sculées y a duc i sculeies la puscibltà d’arjonjer la cumpetënzes ti raions plu mpurtanc”, nsci Kostner.
Scialdi nteressà se à l assessëur Mussner mustrà ala didatica linguistica ntegreda, a chëla che l ti vën te duta la tlasses dat n gran pëis per l aprendimënt dla trëi rujenedes. Dassënn positiva ie per l assessëur ladin l’elaburazion de material de nseniamënt adatà, che la maestres dejëuj te truepa ëures de lëur sëuraprò.
“Dantaldut nce tl raion dl nseniamënt aldò di prinzips dla didatica Montessori, che vën pità chëst ann per l prim iede te na prima tlas, iel de bujën de svilupé truep material didatich che ueghe per pudëi arjonjer i obietifs dl model de furmazion ladin”, nsci Kostner. Permò cun la criazion de materiai adatei che ie boni de descedé duc i sënsc dla mutans y di mutons iel mesun pité n nseniamënt adecuat a nosc tëmps, à dit la diretëura Kostner.
La diretëura à lecurdà che la maestres se ajurnea for inant y la à auzà ora che la bona culaburazion cun la facultà de Scienzes dla Furmazion dl’Università liedia de Bulsan che ti dà ala maestres y ai maestri dl daunì la puscibltà de giapé na udleda tla pratica scolastica da uni dì che ie na seva mpurtanta per l svilup dl nseniamënt.
USP
Galaria dales fotografies
