Atualità
Dai 7 de jená inant: Iscriziuns online por l’ann de scora 2016 - 17
Ince chësc ann él indô poscibl da fá les iscriziuns por l’ann de scora 2016–17 online cun la cherta di sorvisc. Dai 7 de jená dl 2016 é les iscriziuns davertes por les scores elementares de düc trëi i grups linguistics, dai 15 de forá ai 15 de merz sarál spo poscibl da se scrí ite por les scores altes ladines, todësces y talianes sciöche ince por la pröma tlassa dles scores profescionales.
Le sorvisc d’iscriziun online é na novité che porta para plü vantaji por les families, che po fá l’iscriziun por la pröma tlassa dla scora elementara, alta y profescionala diretamënter dal computer de ciasa tres la cherta dl zitadin. L’iscriziun online ne é nia preodüda por la pröma tlassa dles scores mesanes, deache l'iscriziun vëgn efetuada automaticamënter, sciöche ince por i agn do l’iscriziun ala pröma tlassa dla scora elementara, mesana y alta. Por l’ann scolastich 2016/17 ne é l’iscriziun online nia d’oblianza, mo al é n sorvisc debann che vëgn pité en alternativa al’iscriziun sön papier che an pó tres ciamó fá y che romagn varënta. Por s'anuzé dl sorvisc d’iscriziun online val debojëgn da ativé denant la cherta di sorvisc te un di Comuns dl Südtirol (www.provincia.bz.it/cartaservizi/attivazione.asp).
Dai 07 cina ai 25 de de jená dl 2016 sarál poscibl da fá l’iscriziun online por l’ann de scora 2016/17 por la pröma tlassa dla scora elementara de düc trëi i grups linguistics. Tla pröma tlassa dla scora elementara mëssel gní scrit ite dötes les mitans y düc i mituns che complësc i 6 agn cina ai 31 de agost. Implü pol gní scrit ite dötes les mitans y düc i mituns che complësc i sis agn cina ai 30 de aurí dl 2017.
Les iscriziuns online por la pröma tlassa dles scores altes ladines, todësces y talianes sciöche ince por dötes les scores profescionales po gní fates dai 15 de forá ai 15 de merz dl 2016. Ince por l’iscriziun a scores privates él poscibl da s’anuzé dl sorvisc online che ne é nia atif por l’iscriziun tles scolines, por la formaziun da lernerat y por les scores de musiga.
Por de plü informaziuns:
rc
