Atualità
Ejam de maduranza: Les materies dla secunda proa scrita é stabilides
L’Intendënza scolastica ladina á publiché incö (ai 29 de jená) les materies di ejams de maduranza tles scores altes che reverda la secunda proa scrita. La data de scomenciamënt di ejams é chësc ann ai 22 de jügn dl 2016. 100 é atualmënter les scolares y i scolars che frecuentëia na cuinta tlassa dles scores altes ladines.
Le Miur (Ministero Istruzione Università e Ricerca) á publiché les materies dla secunda proa scrita dl ejam de stat 2014-15 y les materies che ti vëgn assegnades ai comissars esterns dla comisciun. Por la Provinzia da Balsan vëgn les materies dessura definides, aladô dl statut de autonomia, dal MIUR sön proposta dles 3 Intendënzes. Insciö él gnü publiché da pert dl Intendënt dr. Roland Verra incö, ai 29 de jená dl 2016, les materies che reverda les scores altes ladines por l’ann scolastich 2015-16.
Por les trëi direziuns dal Scora d’Ert Cademia él gnü chirí fora la materia „Pitöra“ („Ert figurativa“), la materia „Grafica“ (direziun de Grafica) y la materia „Proietaziun y design“ (direziun de Design). Por ci che reverda la Scora profescionala por l’artejanat artistich sará la materia d’ejame dla secunda proa les „Tecnologia dla produziun“, tl Lizeum linguistich gnarál ejaminé la materia „Inglesc“ y pro l’ITE (sides a La Ila co Urtijëi) sará les materies dla secunda proa „Economia aziendala“ (direziun Aministraziun y Marketing) y „Materies dl turism y dl’aziënda“ (direziun Turism). La tabela cun dötes les proes scrites é gnüda injuntada, te chëra che al é ince da ciafé les materies che gnará ejaminades da comissars esterns.
I ejams de Stat dles scores altes mët man ai 22 de jügn 2016 cun la pröma proa scrita. Dötadöm él scrit ite atualmënter 100 studënc y studëntes tla cuinta tlassa dles scores altes tles valades ladines, de chisc 31 scric ite tl Lizeum d’Ert, 47 tl ITE da Urtijëi y 14 a La Ila y 8 scolars fej atualmënter la cuinta tlassa dl Lizeum linguistich a La Ila. Tla scora profescionala de artejanat artistich a Urtijëi tolará ma un n candidat pert al Ejam de Stat (10 é i iscric al cuinto ann).
Pro la pröma proa scrita podará i candidac dles scores ladines chirí fora sce ai ó scrí le tema por talian o por todësch. La secunda proa scrita reverda na materia caraterisënta de chëra scora y á le fin da valuté les conoscënzes speziches dl studënt y dla studënta. La terza proa scrita é partida sö te döes pertes y te dui dis. Le pröm de vëgnel scrit n tema te chël lingaz che ne é nia gnü adoré pro la pröma proa scrita. Le secundo de respogn spo i candidac a na ligna de domandes che reverda 4 o 5 materies. L’ejam de stat se stlüj jö cun la proa a usc che tol ite dötes les materies de chël ann de scora.
rc
