Atualità
Inovaziun y Consulënza: "Storiesapp" da sëgn ince por Android
Do le gran suzes cun 10.000 desćiariades bele fates por le sistem iOS de Apple pó sëgn "Storiesapp", l’app dada fora da Inovaziun y Consulënza por imparé i lingac te na manira plajora, ince gní desćiariada por android da GooglePlay. Le proiet didatich pita indöt set cunties interatives che favorësc l’insegnamënt plurilinguistich y pó gní anuzé por ladin, todësch, talian y inglesc.
Mioré les conescënzes linguistiches te na manira plajora y arichí l’insegnamënt scolastich cun de plü formes didatiches y multimediales: chësc é le fin de "Storiesapp", l’aplicaziun interativa che Inovazion y Consulënza dl Departimënt Educazion y Cultura Ladina á dé fora da püch ince por Android. Por l’intendënt por la scora ladina Roland Verra é le proiet „na scomenciadia de gran valüta por la cumbinaziun danter plurilinguism y multimedia, che s’integrëia dër bun ince te nosc sistem scolastich che sostëgn te na manira mirada la pedagogia interativa“. Le bun anuzamënt dles apps svilupades por iOS, cun plü co 10.000 desćiariades te dui agn, desmostra por le Diretur dl Ciamp Inovaziun y Consulënza Felix Ploner „che l’interes é gran y che le sorvisc vëgn anuzé bun. Da ingröm de perts él gnü damané de mëte ince a desposiziun la verjiun android y chësta é sëgn dan man.“ Insciö pó ince i anuzadus di smartphones y tablets chirí fora danter indöt set stories dal titul: Lu, Paur, Pinsiers, Barbolo, Simeli, Desert, Crazacil.
Aladô dles inrescides de Inovaziun y Consulënza ti sál a tröc mituns/tröpes mitans dër bel da se dé jö cun cunties, lingac, mesi desvalis y rapresentaziuns grafiches. Le proiet "Stories" é insciö deventé n stromënt interatif che dá la poscibilité da lí y ascuté sö, mo ince da »aziché« les cunties. Storiesapp é adaté por mituns y mitans, dala scolina ala scora elementara y dla scora mesana por l’insegnamënt integré di lingac.
N ater vantaje de Storiesapp é che le sorvisc pó ince gní adoré a ciasa tres tablet o fonin, olache les apps vá da mëte da jí, y sce an pënsa che la maiú pert di injiuns vá cun le sistem android, spo é chësta dessigü na ocajiun por fá conësce chësc sorvisc ciamó deplü. Vigni cuntia é da aldí te 4 lingac: por ladin dla Val Badia, ladin de Gherdëna, talian, todësch y inglesc. Lapró él ince la posciliblité da imparé parores nöies che vëgn dant tles scenes dles stories.
Interessant é ince n valgügn dac che vëgn dala statistica: insciö é ti pröms önesc posć di downloads la Talia al pröm post, secunda la Germania, spo daldô él da ciafé les Naziuns Unides d’America, le Japan, la Cina, la Svizera, le Thailand, l’Austria, la Malaysia, l’India y l’Australia. Interessant é ince da odëi la tlassifica dles stories plü desćiariades: Lu, Barbolo, Simeli, Deserts, Crazacil, Pinsiers y Paur.
Co desciarié les stories sön i fonins y tablets: daurí la botëga virtuala "GooglePlay", dé ite la parora de chirida "pedagogich.it" y aspeté cina che les app se visualisëia. Druché spo sön "istalé". Deplü informaziuns sön le download é da ciafé sön le sit pedagogich.it
rc
Galaria dales fotografies
Foto (USP/Inovaziun y Consulënza)
