Atualità
Istitut cultural ladin Micurá de Rü: finanziamënt de 1,2 miliuns de euro
Cun 1,2 miliuns de euro sostëgn la Provinzia te na manira consistënta ince por le 2016 les ativités y le program dl Istitut cultural ladin „Micurá de Rü“. La Junta provinziala á aprové inier (08/03) sön proposta dl assessur Florian Mussner chësta soma sciöche finanziamënt dles ativités dl zënter de competënza culturala a bëgn di ladins, di cosć dl personal y dla formaziun por adulc.
„L’Istitut cultural ladin Micurá de Rü cun sües sëntes a San Martin y Sëlva á le compit prinzipal da sostigní y studié a livel scientifich la storia y la cultura di Ladins dles Dolomites te sü aspec plü desvalis“, á sotligné l’assessur ladin Florian Mussner. Sciöche l’assessur á recordé é l’Istitut ladin ince le pröm partner de consulënza por la Junta pro ci che reverda les tematiches dla sconanza y dl svilup dla cultura ladina. Implü é sües inciaries ince chëres da mioré le ladin scrit y baié y da renforzé i lians cun les atres mendranzes di Grijuns y dl Friul, insciö l’assessur.
La soma de 1,2 miliuns de euro é gnüda aprovada inier (ai 08 de merz) dala Junta provinziala sön proposta dl assessur Florian Mussner y insciö pó l’Istitut ademplí inant sü compic istituzionai, finanzié i cosć di colaboradus y dles colabordësses y garantí les ativités y i cursc de formaziun y ajornamënt (Weiterbildung) por adulc. Na pert di finanziamënc dl Istitut é ince garantida da sorvisc, laurs a proiet y inciaries de consulënza. Implü vëgn l’ativité sostignida dai Comuns y da Fondaziuns.
rc
