Atualità
Mësa torona ai 9 d’aurí sön l'importanza de cultura y ert por la sozieté
En sabeda, ai 9 de aurí, gnarál metü a jí dales 10.30 tla sënta dla Biblioteca provinzala dla Teßmann na mësa torona sön la relevanza dla cultura y dl ert por la popolaziun dl Südtirol. La scomenciadia vëgn organisada adöm ala Lia di artisć dl Südtirol.
L’archif leterar dla Lia di artisć dl Südtirol y la Biblioteca provinziala Dr. Friedrich Teßmann documentëia cun passa 24.300 plates la vita leterara tla provinzia. Dai agn `80 incá cöi adöm le Raiun Leteratöra dla Lia di artisć dl Südtirol articui, invic a presentaziuns de libri y incuntades cun auturies y auturs, sciöche ince rezensciuns sön ci che sozed a livel leterar y cultural tl Südtirol. Chësc archif é gnü digitalisé cun le sostëgn finanziar dla Fondaziun Cassa dl Sparagn dl Südtirol y é a desposiziun online: http://digital.tessmann.it/literaturarchiv.
Por la conclujiun dl proiet vëgnel metü a jí na mësa torona sön la relevanza dla cultura.
La tesa da chëra che an pëia ia pro chësta mësa torona é che la cultura á ma plü n pice rode tla sozieté dl Südtirol, ince sce al é na componënta fondamentala dla vita publica. Les aristes y i artisć ne baia nia plü tan sovënz de temesc politich-culturai y soziai. Essi mo na responsabilité de chësc vers? Dl ater vers él gnü a se le dé te chisc ultimi agn na generaziun jona che fej cultura, che chir y sostëgn la confrontaziun publica cun l‘ert y la reflesciun sön l’incuntada danter cultura y sozieté.
La mësa torona de discusciun gnará metüda a jí en sabeda, ai 09 d’aurí, dales 10.30, tla sënta dla Biblioteca provinziala Teßmann, strada A. Diaz a Balsan. Al tol pert: Eduard Demetz, Hannes Egger, Elmar Locher, Emanuele Masi und Renate Mumelter. La manifestaziun dla vëgn metüda a jí en colaboraziun cun la Lia di artisć dl Südtirol.
rc
