Atualità
Scora ladina: Sëres de discusciun sön scolina, scora y families
Cöi adöm propostes por ajorné la colaboraziun danter scolina, scora y families é la tematica prinzipala de döes sëres de discusciun ai 14 d’aurí a Urtijëi (dales 20:00) y ai 21 d’aurí a La Ila (dales 16:30). Les incuntades vëgn metüdes da jí dal’Intendënza ladina, ala pert ince l’assessur por la scora ladina Florian Mussner y l’intendënt Roland Verra. Düc é inviá.
Ciaré derevers ales aziuns dl Departimënt dla Scora y Cultura ladina do les incuntades de dialogh dl 2014, analisé la situaziun atuala por ci che reverda la reforma scolastica dla „La buona scuola“ y dantadöt cöi adöm propostes sön la colaboraziun tl dagní danter scolina, scora y families: chëstes é les tematiches prinzipales de döes incuntades dal titul „Le dialogh danter scolina, scora y familia tl sëgn dl’inovaziun“ ai 14 d’aurí a Urtijëi y ai 21 d’aurí a La Ila. Do i salüc dl assessur por la scora ladina Florian Mussner y dl intendënt Roland Verra gnarál presenté na picera retrospetiva sön i resultac dles ultimes incuntades de novëmber dl 2014 dal ispetur por les scores ladines Albert Videsott, dedô sarál Carla Comploj che tignará na relaziun sön la colaboraziun danter les istituziuns scolastiches y les families. Le punt prinzipal dles incuntades sará i workshops por inrescí plü a funz les propostes de ajornamënt dla relaziun scora – familia.
La pröma incuntada sará
ai 14 d’aurí dl 2016
dales 20:00
tl’aula magna dl ITE „Raetia“
strada Raetia 295
a Urtijëi.
La secunda sëra d’informaziun sará
ai 21 d’aurí dl 2016
dales 16:30
tl’aula magna dla Scora mesana „Tita Alton“
strada Ninz 9
a La Ila.
Düc i interessá é inviá a tó pert. La partezipaziun ala manifestaziun vëgn reconesciüda sciöche ativité de formaziun dl personal dla scora y scolina. I invic é gnüs injuntá.
rc
