Atualità
"Ladin nte Scola": Evaluaziun sön le trú
Ladin nte Scola á inom le proiet de valorisaziun dl ladin tla scora elementara dl Comun de Fodom. Sëgn gnarál fat na pröma evaluaziun dl insegnamënt.
Tla scora elementara dl Comun de Fodom vëgnel organisé da plü agn le proiet dal inom „Ladin nte Scola“ finalisé al’adoranza sistematica dl Ladin tl setur scolastich che á consintí da realisé ince mosöres de sostëgn dl lingaz sciöche preodü ince dala lege statala 482/99 en materia de sconanza dles mendranzes linguistiches.
Por analisé y monitoré le status quo dl proiet él gnü fat fora da fá na pröma valutaziun dles ativités y dles metodes anuzades tres le proiet de valorisaziun dl ladin tl setur scolastich. Al gnará ejaminé le proiet tres cuestionars che fej referimënt ala perioda dl ann scolastich atual 2015/16. Chësta pröma aziun de monitoraje é gnüda acompagnada inier (ai 19 de ma) cun na vijita da pert dl intendënt scolastich ladin Roland Verra, dla colaboradëssa dl Sorvisc evaluaziun dl’Intendënza Rosmarie Mussner y dla colaboradëssa dl Ispetorat dles scores ladines Romy Canins. „L’impresciun che i ún albü dala vijita ala scora é dër positiva, ince por ci che reverda i resultac che é bele gnüs arjunc tl setur dla stabilisaziun y promoziun dl ladin, cun n azes pedagogich-didatich sensibl y adaté al svilup cultural di scolars“, spliga l’intendënt por les scores ladines Roland Verra. Ala vijita ál ince tut pert le diretur dl Istitut Cultural Ladin "Cesa de Jan" Moreno Kerer, l’insegnanta responsabla dl proiet Isabella Marchione y le suranstant dla Direziun scolastica raionala de Alleghe Paolo Giovanni Zanin. Chësta pröma aziun jará spo inant cun la racoiüda y l’analisa di cuestionars, che é bele gnüs partis fora ales families y ai insegnanc dles tlasses interessades.
Le proiet é gnü a se le dé por merit dla colaboraziun, formalisada tres na Convenziun, danter l’Intendënza ladina da Balsan, l’Istitut Cultural Ladin Cesa de Jan y la Direziun scolastica raionala de Alleghe. Vignöna dles trëi istituziuns fej para al proiet aladô de sües competënzes.
rc
Galaria dales fotografies
Foto: USP/ Romy Canins
