Atualità
Per l di mundiel di jëuni: „Anjenië i jëuni al mond dl lëur“
„L dessa vester n duvier de duc i guvierns dl mond, chël de anjenië ca bën i jëuni al mond dl lëur“, chësc se damanda i trëi assessëures ala furmazion Luisa Gnecchi, Sabina Kasslatter Mur y Florian Mussner n ucajion dl di mundiel di jëuni, n merdi ai 12 de agost 2003. For plu jëuni sun dut l mond ie zënza lëur, nsci dij l scrivan generel dla UNO Kofi Annan per l di mundiel di jëuni. „La globalisazion y la tecnica che ie for n evoluzion porta pusciblteies de lëur nueves y se damanda nce for deplù dai jëuni“ nsci i assessëures ala furmazion. Na bona furmazion y preparazion al mestier dessa anjenië jënt jëuna al mond dl lëur, sorissea Gnecchi, Kasslatter Mur y Mussner.
„La furmazion a basa lergia y n bon sistem de furmazion profesciunel ie la fundamënta acioche i jëuni abine na stiera“ dij i trëi respunsabli plu auc per la furmazion tla Provinzia. Cun chësc fin se à i assessëures mpenià ti ani passei. „L dessa vester l duvier di guvierns dl mond, chël de anjenë ca bën i jëuni al mond dl lëur“, se damanda Gnecchi, Kasslatter Mur y Mussner. Tres la tecnica che va inant drët aslune y la globalisazion vëniel a se l dé de nuef ciamps de lëur per jënt jëuna. Ma n se damanda nce for de plu da d’ëi. L vën pertendù de plu flessibltà. Truepa ncëries vën me plu sëurandates cun cuntrac a tëmp. Nce l mudé luech toca pra l lëur y l orar de lëur ne ie nia for unfat nscì sciche l fova plu da giut. „Da chësc pont de ududa dessa i jëuni mo unic anjeniei ca miec y n i dessa sustenì a giapé crëta te se nstësc“ nsci la ulentà di assessëures. Per mustré su la cumpetënzes profesciuneles y sozieles se à i respunsabli dla scola y scola profesciunela mpenià ti ani passei. Ëi ie de chëla che la cumpetënzes dessa unides documentedes a na maniera da pudëi les paradlé a livel dl’Europa y pona plu inant nca a livel mundiel. „L ne basta nia a avëi me de bona pusciblteies de furmazion - i jëuni dessa nce unì cumpaniei sun si troi de viers dl mond dl lëur. Nëus messon ti judé ai jëuni tl urientamënt, ti mustré su perspetives y i sustenì sun si streda. Na generazion zënza speranza sun n lëur ie n problem per duta la sozietà“ nsci la paroles de Luisa Gnecchi, Sabina Kasslatter Mur y Florian Mussner.OSP
