Atualità
Aprovaziun ddl de adatamënt dla reforma „La Buona Scuola“
Sodesfaziun da pert dl assessur por la scora ladina Florian Mussner por l'aprovaziun da pert dl Consëi provinzial al ddl de adatamënt dla reforma scolastica.
„N valgönes novités importantes por le sistem scolastich ladin é cun l’aprovaziun dla lege sön l’adatamënt dla reforma scolastica „La Buona Scuola“ l'integraziun dla valutaziun do competënzes di scolars, les mosöres cuntra l’arbandon scolastich y le renforzamënt dla colaboraziun danter les scores y le monn dl laur“, spliga l’assessur por la scora ladina Florian Mussner che se mostra contënt dl’aprovaziun dla lege provinziala incö, ai 10 de jügn, tl Consëi provinzial y che é gnüda laurada fora en colaboraziun cun i atri assessurs por la scora Christian Tommasini y Philipp Achammer y cun les atres döes Intendënzes. „Implü sarál sëgn poscibl da amplié les competënzes dla Provinzia tl setur scolastich y da s’anuzé la liberté de gestiun autonoma da pert dles singules scores preodüda tl contest dl adatamënt dla reforma“, insciö Mussner. L’ampliamënt dles competënzes ti dá insciö plü autonomia mo ince responsabilité ai direturs y ales scores, recorda l’assessur.
La Parliamënt talian á aprové tl mëis de lugio dl 2015 le lege de reforma scolastica „La Buona Scuola“. Da öna na pert á chësta lege nöia porté pro a amplié les competënzes dl Südtirol te chësc setur. Insciö sce la lege statala ne vëgn nia aplicada diretamënter tla Provinzia de Balsan, mëss impó le sistem scolastich provinzial s’adaté ales diretives y linies generales dla regolamentaziun statala, deache les competënzes provinziales tl setur dl’insegnamënt scolastich tles scores elementars, mesanes y altes é secundares y nia primares.
Les mudaziuns plü importantes
Tres la reforma scolastica vëgn l’autonomia dles scores renforzada. Insciö él por ejëmpl preodü la creaziun de n plann trienal dles ofertes de formaziun tles scores, che pormët na planificaziun y n finanziamënt costant. L’ampliamënt dl’autonomia scolastica porta ince para na maiú responsabilité di suranstanc, y al vëgn ince aumenté les libertés tl setur dla valutaziun di scolars y dles scolares cun la poscibilité da valuté aladô dles competënzes, sciöche integraziun al sistem da valutaziun tres les notes. Ince le laur di suranstanc scolastics gnará valuté y reverdará i obietifs y la metüda en pratica dl plann trienal dl’oferta formativa.
N general dessel ince gní amplié la colaboraziun danter la scora y le monn dl laur. Insciö él preodü che les scores stabilësces, aladô dles diretives provinziales dl plann trienal, mosöres por sostigní les incuntades danter i scolars y le monn dl laur. Le fin de chësc prinzip é de promöie l’orientamënt di scolars y de alisiré l’integraziun tl monn dl laur. Por i scolars y les scolares él preodü mosöres por la promoziun di talënc, le finanziamënt de ativités formatives, por le mioramënt dles prestaziuns scolastiches y por la diminuziun dl arbandon scolastich.
rc
