Atualità
Convëgn internazional söi museums y les mendranzes (23-24 jügn)
Ai 23 y ai 24 de jügn organisëia le Museum Ladin n convëgn internazional sön les mendranzes linguistiches y sü museums tl Istitut Ladin a San Martin.
Les mendranzes linguistiches y sü museums sciöche ocajiun de promoziun y de sconanza dl patrimone cultural: chësta é la tematica dl convëgn internazional organisé dal Museum Ladin cun le titul „Valorisé les identités y les comuniché al estern: i museums por „maioranzes y mendranzes“ metará man
en jöbia ai 23 de jügn dl 2016
dales 09:30
tla sënta dl Istitut Ladin
strada Stufles 20
a San Martin de Badia
cun i salüc da pert dl assessur provinzial Florian Mussner, dl parlamentar ladin Daniel Alfreider, dla direturia dla Repartiziun Museums y dal’Aziënda „Museums provinziai“ Karin Dalla Torre y dl secreter general dla Federal Union of Euripean Nationalities (FUEN) Susan Schenk. Daldô gnarál a se le dé n intervënt da pert dl presidënt dl Consëi internazional di museums (ICOM) Hans Marin Hinz. I moderadus dl convëgn sará l’intendënt scolastich ladin Roland Verra y le mediadú cultural svizer Chasper Pult.
Le convëgn prevëiga la partezipaziun de plü esperc y espertes internazionales dl setur museal y de rapresentanc culturai dles mendranzes linguistiches europeiches. Do la daurida ofiziala jará la manifestaziun inant por döt le de ai 23 de jügn cina les 18.30 y ince en vëndres ai 24 de jügn (dales 09.15-18.00).
L’incuntada internazionala dess ince ester n’ocajiun d’analisa dl’importanza dles ativités museales por les mendranzes linguistiches t’Europa. N punt de stüde prinzipal dl'incuntada sará les formes futures dla promoziun dl'arpejiun culturala. Le convëgn vëgn organisé en gaujiun di 15 agn dala inauguraziun dl Museum Ladin y vëgn sostigní dala FUEN (Federal Union of European Nationalities) tratan la perioda dl’Europeada, le campionat europeich dl jüch al palé dles mendranzes europeiches cun partides ince tla Val Badia y tla Val de Puster.
Por plü informaziuns: Museum Ladin Ćiastel de Tor, via Tor 65, San Martin de Badia, tel. 0474 524020, www.museumladin.it
rc
