Atualità
Proiet interladin „Ladin nte Scola“: Analisa di cuestionars
Por la fin dl isté dess i pröms resultac dl’evaluaziun dl proiet „Ladin nte Scola“ ester da garat. Le grup de laur d’evaluaziun s’á incunté dan da püch a La Ila
Por consintí na valutaziun mirada dles ativités y dles metodes adorades tratan le proiet de ladin tla scora elementara de La Plí de Fodom „Ladin nte Scola“ él gnü organisé inann n valgönes aziuns de monitoraje da pert dl’Intendënza Ladina de Balsan, adöm cun l’Istitut Cultural Ladin „Cesa de Jan“ y la Direziun scolastica raionala de Alleghe. Do la pröma vijita de monitoraje s’á le grup de laur incunté ai 15 de jügn a La Ila por jí inant cun l’analisa di cuestionars scric fora dles families y dai scolars cun i resultac che gnará spo presentá te na forma definitiva ala fin dl isté.
Dl grup de laur metü adöm por fá le monitoraje fejel pert le responsabl dl proiet y diretur dl Istitut cultural Ladin "Cesa de Jan" Moreno Kerer, la responsabla dl Sorvisc evaluaziun dl’Intendënza Rosmarie Mussner, la colaboradëssa dl Ispetorat dles scores ladines Romy Canins y la maestra responsabla dl proiet Isabella Marchione.
Le proiet é gnü a se le dé por merit dla colaboraziun, formalisada tres na Convenziun danter l’Intendënza ladina da Balsan, l’Istitut Cultural Ladin "Cesa de Jan" y la Direziun scolastica raionala de Alleghe.
rc
