Atualità
La Junta á metü man cun l’iter por la reforma di organs colegiai
Do 20 agn gnarál sëgn reformé la normativa söi organs colegiai dles scores y dles scolines. Chësta dezijiun é gnüda tuta inier dala Junta.
L’esigënza de n ajornamënt dla normativa di organs colegiai tles scores statales y tles scolines dl Südtirol, che é varënta da vint agn, é gnüda portada dant bele plü iadi ince dai rapresentanc dles istituziuns scolastiches y dai sindacac.
Chësta mudaziun é nezesciara ince tignin cunt dl fat che cun l’ann 2017 ará les scores profescionales na personalité iuridica aposta y ciafará insciö competënzes nöies tl setur dl’aministraziun y dla contabilité. I assessur por la formaziun Christian Tommasini, Florian Mussner y Philipp Achammer á insciö presenté ala Junta, tratan la sentada da inier, na proposta unitara por l’elaboraziun de na reforma dla normativa söi organs colegiai.
Le pröm vare é sëgn l’istituziun de n grup de laur cun i rapresentanc dles scores statales, dles scores profescionales y dles scolines che messará elaboré na pröma proposta por n test de lege por che la normativa provinziala sides en forza cun le scomenciamënt dl ann scolastich 2017/18. La Junta provinziala á aprové la proposta y la prozedöra: le proscim vare sará sëgn l’inciaria ai trëi intendënc da nominé i componënc dl grup de laur.
rc
