Atualità
De europeich dl patrimone: Cinch posć da vijité
“Mantigní i bëgns culturai: n impëgn de düc” é le moto dl’ediziun atuala dl De europeich dl patrimone cun cinch posć particolars che podará gní vijitá ai 16/10.
De plü avenimënc particolars, en guajiun dl De europeich dl patrimone, gnará a se le dé ai 16 d’otober cun vijites acompagnades te posć culturai cun n valur prezius a Urtijëi, a Frangart/Balsan y a Porsenú. “Nosta intenziun é chëra da motivé le plü porsones che ara vá da jí a ti ciaré a nüsc tesurs dla cultura, che ne é nia ma na testimonianza de nostes raisc y identité, mo che é ince la basa por svilupé nosc dagní”, á dit l’assessur por i bëgns culturai Florian Mussner. Recordan le moto “Mantigní i bëgns culturai: n impëgn de düc” á l’assessur Mussner spo sotrissé che le compit dla conservaziun y dl mantignimënt di bëgns culturai é n laur che interessëia döta la sozieté. Le De europeich dl patrimone é na scomenciadia culturala dl Consëi europeich che vëgn sostignida dal’Uniun europeica. Tl Südtirol vëgn le de metü da jí bele da önesc agn cun suzes, á recordé la direturia de Repartiziun Christine Roilo.
Öna dles particolarités da podëi vijité ai 16 d’otober é le lüch da paur Peza sö Sacun che é un di plü vedli lüc da paur de Gherdëina. Les carateristiches dl frabicat é gnüdes spligades incö da Paulina Moroder dl Museum Gherdëina. Le lüch vëgn insciö nominé por le pröm iade tl 1277 y s’á mantigní cina aldedaincö cun mudaziuns che é gnüdes a se le dé tratan la perioda dl gotich y spo dl baroch. Por düc i interessá a na vijita vëgnel metü a desposiziun n shuttle bus dales 13:30 ales 14:30 dala dlijia de San Durich demez, dales 14:00 y dales 15:30 sarál spo vijites acompagnades cun ince n prorgam por mituns y jogn dales 14:00 inant.
N’atra scomenciadia dl De europeich dl patrimone sará ai 16 d’otober vijites tla Hofburg da Porsenú cun le focus sön le lëgn genealogich dla dinastia “Habsburg” dl artist Hans Hans Reichle y che é öna dles operes artistiches plü importantes por ci che reverda le tëmp danter Renaissance y le pröm Baroch tl Südtirol. Vijites acompagnades gnará a se le dé dales 10:00, 11:00, 14:00, 15:00 y 16:00. Implü sarál ince poscibl da vijité en domënia ai 16 d’otober le lüch da paur Thalhofer a Porsenú che é gnü ressané te na manira particolara adöm al’assoziaziun “Südtiroler Kinderdorf” y che vëgn adoré dötaurela sciöche zënter por terapies y seminars. Les vijites sará dales 10:00, 11:00, 14:00, 15:00 y 16:00. Tres en colaboraziun cun le “Südtiroler Kinderdorf” sarál davert al publich l’areal y la ciasa familia che é gnüdes fates sö ti agn 1956 cina 1963 da Othmar Barth, un di architëc südtirolej plü conesciüs di ultims 60 agn. L’areal sará davert dales 10:00 ales 12:00 y dales 14:00 ales 16:30.
Por ci che reverda l’aspet dl’archeologia sarál l’Ofize di bëgns archeologics che deura sü ofizi a Frangart por podëi vijité la mostra “Strades dl’epoca romana che passâ tl Südtirol”. Tratan la perioda dl Imper Roman passâ trëi strades amesa le Südtirol cun le fin da colié te na manira asvelta i raiuns tles Alpes y por le trasport de marcianzies, por le spostamënt dles trupes, por gaujies economiches y por la defujiun dla cultura romana. N valgügn reperc dl’epoca che testimonëia le passaje dles strades romanes é conservades tl archif a Frangart che sará davert dales 10:00 ales 17:00 por vijites acompagnades.
Por plü informaziuns sön le De europeich dl patrimone tl Südtirol: http://www.provinz.bz.it/denkmalpflege/themen/europaeischer-tag-denkmal-schutz.asp.
rc
Galaria dales fotografies
