Atualità
Letöra de poesies tla Teßmann al pröm de dezëmber
Les döes auturies Anne Marie Pircher y Vera Vieider liará fora de sües publicaziuns liriches al pröm de dezëmber tla Biblioteca Teßmann a Balsan.
„Intensifiché les gran picolëzes dla vita“ á inom la sëra de lëtora che vëgn metüda da jí dala Teßmann en colaboraziun cun le Südtiroler Künstlerbund en jöbia al 1. de dezëmber dales 20:00 tla sënta dla Biblioteca provinziala a Balsan. Al liará fora de sües publicaziuns les auturies Anne Marie Pircher (dal liber “Über Erde”) y Vera Vieder (dal liber “Leichtfüßig sein”). Anne Marie Pircher é nasciüda dl 1964 y é chersciüda sö a Schenna; ara vir y laora a Kuens dlungia Maran. Dal 2000 incá scriera lirica, stories y toc de teater. Vera Vieider é nasciüda dl 1988 a Maran, ara vir y laora sciöche farmazista a Minca. „Leichtfüßig sein“ é so terzo liber de poesies.
Ci che les döes liriches á deboriada é che ares scrí poesies lisieres che inviëia a fá na reflesciun sön ci che an á lit. Te trëi ziclus cunta la Pircher de contrades daimpró y dalunc, de incuntades danter les porsones, dla natöra. I momënc fotografá vëgn descric cun n lingaz dër avisa, i tesć poetics vëgn perfezioná cun metafores delicates y imajes armonioses. Les poesies dla Vieider invers trasformëia cosses banales te cosses demorvëia y misterioses. Cun püces parores prezises scriera dl amur o dles variaziuns dla löm, ma por nominé dui ejëmpli.
Tratan la sëra sarál ince Ferruccio Delle Cave dl Südtiroler Künstlerbund che rajonará de "Aspec y strategies dla lirica todëscia d'aldedaincö“ („Aspekte und Strategien heutiger deutscher Lyrik“). La sëra de discusciun y letöra sará por todësch, l’entrada debann. Düc é dër bel inviá.
USP
