Atualità
Dala Junta: criters nüs por le curs universitar por insegnanc
La Junta provinziala á stabilí i contignüs por la prozedöra de amisciun al curs universitar de Sciënzes dla formaziun primara.
Cun la „Buona scuola“, la reforma aprovada tl 2015 dal Parlamënt, á la Provinzia de Balsan ciafé na seria de competënzes nöies tl setur dl’istruziun: un di articui dla lege 107 prevëiga che la Provinzia pois regolamenté te na manira autonoma, en acordanza cun l’Université Lëdia da Balsan, la formaziun pedagogica y didatica di insegnanc dles scores südtirolejes. Al pó gní regolamenté ince les proes d’azes ai cursc che pó ester por todësch y ladin aladô di programs d’insegnamënt varënc tl Südtirol. Incö á la Junta provinziala aprové les modalités y i contignüs por la prozedöra d’amisciun al curs de laurea magistrala de Sciënzes dla Formaziun primara por l’ann academich 2017/18. I criters nüs é gnüs elaborá dal’Université da Balsan y prevëiga döes sesciuns despartides por la prozedöra de amisciun.
La prozedöra de amisciun sará despartida te döes perts, öna scrita y öna a usc cun l’obietif da analisé la preparaziun dl candidat söles conescënzes de basa y sön la competënza comunicativa, personala y soziala. La pert scrita reverda danter l’ater noziuns de leteratöra, sciënzes soziales y geografia, matematica y sciënza. Implü gnarál ince ejaminé les competënzes linguistiches dl candidat. Al gnará ince valuté le candidat por ci che reverda le rode d’insegnant en general sön la basa dles indicaziuns provinziales.
USP
