Atualità
Sëres de dialogh sön la reforma di organs colegiai dles scores
La reforma di organs colegiai y les formes de partezipaziun tles istituziuns scolastiches sará tl zënter de döes sëres de discusciun a San Martin y a Urtijëi.
L’assessur por la scora y la cultura ladina Florian Mussner y l’intendënt Roland Verra inviëia a döes sëres de dialogh che se dará jö cun la reforma di organs colegiai dles scores. Deache la lege nazionala 107/2015 á porté n valgönes mudaziuns al’organisaziun dl sistem scolastich y ala strotöra di organs colegiai, éle sëgn debojëgn da les adaté ales desposiziuns provinziales che regolamentëia les formes de partezipaziun ala gestiun dles scores y scolines.
Les döes sëres de „Dialogh“ gnará tignides
en mertesc, ai 10 de jená dl 2017
dales 20:00
tl Salf di Stödafüch
a San Martin de Tor
y
en jöbia, ai 12 de jená dl 2017
dales 20:00
tl’Aula Magna
dl ITE „Raetia“ a Urtijëi.
Te na mësa torona cun rapresentantes y rapresentanc de dötes les componëntes dl monn dla scora ladina gnarál traté le tema dla partecipaziun tl monn dla scora y dla funziun di organs colegiai che vëgn litá da geniturs, studënc y insegnanc. Te chëstes ocajiuns tolará le Departimënt Educaziun y Cultura ladina sö propostes da porté ite tla discusciun che gnará fata a livel provinzial por lauré fora la lege provinziala nöia che regolamënterá tl dagní les formes de partezipaziun tles istituziuns scolastiches.
usp
