Atualità
Ejam de maduranza: Les materies dla secunda proa scrita é chiló
L’Intendënza scolastica ladina á publiché incö les materies dla secunda proa dl ejam de Stat 2016-17 tles scores altes ladines.
Le Miur (Ministero Istruzione Università e Ricerca) á lascé alsavëi les materies dla secunda proa scrita dl ejam de Stat 2016-17 y les materies che ti vëgn assegnades ai comissars esterns dla comisciun. Por la Provinzia da Balsan vëgn les materies dessura definides, aladô dl statut de autonomia, dal MIUR sön proposta dles 3 Intendënzes. Insciö él gnü comuniché da pert dl Intendënt dr. Roland Verra incö, ai 31 de jená dl 2017, les materies che reverda les scores altes ladines por l’ann scolastich 2016-17.
Por les trëi direziuns dl Lizeum d’Ert “Cademia” él gnü chirí fora la materia „Scultura y Depënje“ (seziun Ert figurativa), la materia „Grafica“ (seziun Grafica) y la materia „Design“ (seziun Design). Por ci che reverda la Scora profescionala por l’artejanat artistich sará la materia dla secunda proa „Tecnologia di prozesc produtifs “, tl Lizeum linguistich gnarál ejaminé la materia „Inglesc“ y tl Lizeum dles Sciënzes Umanes la materia „Sciënzes umanes“. Pro l’ITE (sides a La Ila co a Urtijëi) sará les materies dla secunda proa „Economia aziendala“ (seziun Aministraziun, Finanza y Marketing) y „Disciplines turistiches y aziendales“ (seziun Turism).
I ejams de Stat dles scores altes mët man ai 21 de jügn dl 2017 cun la pröma proa scrita. Dötadöm él scrit ite atualmënter 79 studënc y studëntes tla cuinta tlassa dles scores altes tles valades ladines, de chisc 36 scric ite tl Lizeum d’Ert, 30 tl ITE da Urtijëi y 7 a La Ila y 6 scolars fej atualmënter la cuinta tlassa di Lizeums a La Ila. Tla scora profescionala de artejanat artistich a Urtijëi tolará 4 pert al ejam de Stat.
Pro la pröma proa scrita podará i candidac dles scores ladines chirí fora sce ai ó scrí le tema por talian o por todësch. La secunda proa scrita reverda na materia caraterisanta de chëra scora y á le fin da valuté les conoscënzes speziches dl studënt y dla studënta. La terza proa scrita é partida sö te döes pertes y te dui dis. Le pröm de vëgnel scrit n tema te chël lingaz che ne é nia gnü adoré pro la pröma proa scrita. Le secundo de respogn spo i candidac a na ligna de domandes che reverda 3 o 4 materies. L’ejam de Stat se stlüj jö cun la proa a usc che tól ite dötes les materies de chël ann de scora.
usp
