Atualità
Imprëst danter biblioteches: dal 2016 lapró ince chëra da La Ila
Le sorvisc d'imprëst interbibliotecar é gnü metü a sö dl 2011 sciöche proiet pilot. Da setëmber dl 2016 incá él ince rové lapró la biblioteca da La Ila.
Le sorvisc d'imprëst interbibliotecar dl Südtirol é n'oferta de sorvisc che é gnüda porvada fora por le pröm iade dl 2011 sciöche proiet pilot. Pro le sistem d'imprëst interbibliotecar tochel les trëi biblioteches zentrales - la Biblioteca provinziala todëscia y ladina „Dr. Friedrich Teßmann“, la Biblioteca provinziala taliana „Claudia Augusta“ y la Biblioteca zivica da Balsan - sciöche ince 15 biblioteches sparpagnades fora sura döta la provinzia. Pro les 14 biblioteches che á bele daimpröma incá pité le sorvisc d'imprëst interbibliotecar él de setëmber dl 2016 ince rové lapró la Biblioteca de valada Sas dla Crusc da La Ila, sciöche post nü olache ara vá da se fá mené adalerch libri y media da d'atres biblioteches. Les atres biblioteches é: la:Biblioteca zivica da Porsenú, la Biblioteca zivica da Bornech, la Biblioteca zentrala todëscia da Eppan, la Biblioteca publica da Lana, la Biblioteca „Don Bosco“ da Leifers, la Biblioteca Comunala da Mals, la Biblioteca zivica da Maran, la Biblioteca todëscia da Egna, la Biblioteca comunala „Endidae“ Egna, la Biblioteca publica da Türesc, la Biblioteca de valada "San Durich" Urtijëi, la Biblioteca zentrala Schlandersburg a Sulaneres, la Biblioteca zivica da Sterzing y la Biblioteca publica da Toblach.
Por mirit dl sorvisc d'imprëst interbibliotecar dl Südtirol á i utënc y les utëntes di paisc desvalis dla provinzia la poscibilité da s'aposté y s'impresté fora libri y d'atri media dales trëi biblioteches zentrales, zënza messëi instësc jí a Balsan. Le sorvisc de trasport dl'Ofize Media audiovisuai condüj adalerch un n iade al'edema tla biblioteca che fej pert dl sorvisc d'imprëst interbibliotecar i libri o i media dejidrá.
Bele dal scomenciamënt incá é chësta oferta gnüda tuta sö bun y le numer di imprësć danter les biblioteches é chersciü da ann en ann. Dl 2016 él gnü registré avisa 11.716 imprësć tres le sorvisc d'imprëst interbibliotecar (dl 2011 canche al é gnü metü sö chësc sorvisc nen él sté indöt 8.910). Le plü sovënz él gnü damané do libri y media dla Biblioteca provinziala Dr. Friedrich Teßmann cun 10.355 imprësć.
usp
