Atualità
Dal 2018 l'ejam de maduranza ince tres le lernerat
Do cater agn de n percurs de lernerat sarál poscibl da fá l’ejam de maduranza por merit de n curs de dui agn de preparaziun.
Tl dagní sarál poscibl por i lerneri y por les lerneres de n curs de cater agn dla formaziun profescionala de lingaz todësch da podëi tó pert al ejam de maduranza por merit de n curs de dui agn de preparaziun al ejam de maduranza colié al lernerat. La basa iuridica de chësta forma particolara de lernerat é gnüda inserida tl 2015 tla reforma statala dl marcé dl laur „Jobs Act“. Tratan l’ann scolastich 2017-18 gnarál proponü por le pröm iade n curs spezifich tla Scora profescionala de lingaz todësch por l’artejanat y l’industria de Balsan por lerneri che á stlüt jö l’ejam de lernerat de n curs de cater agn o che á stlüt jö n curs de cater agn pro na scora profescionala o che le stlüj jö tl ann scolastich 2016/17.
I detais de chësc proiet é gnüs presentá incö ai 6 de merz dal assessur provinzial Philipp Achammer te na conferënza stampa a chëra che al á ince tut pert le diretur dla formaziun profescionala de lingaz todësch Gustav Tschenett y la direturia dl Ofize lernerat y artejanat Cäcilia Baumgartner. „L’obietif de chësc proiet“, á sotligné te so intervënt l’assessur provinzial Philipp Achammer, „é chël da ti lascé daverta l’opziun ai scolars da podëi rové cun entrami i percursc, chël dla scora alta y chël dla scora profescionala, al ejam de Stat.“
En pratica él preodü curs de dui agn de preparaziun al ejam de maduranza por lerneri che á bele stlüt jö n curs de cater agn de lernerat o n percurs de cater agn a tëmp plëgn de na scora profescionala o che é tl stlü jö le percurs tl ann scolastich 2017. L’eté plü alta por podëi tó pert a chësc proiet é de 24 agn. Deache le curs de dui agn é ponsé por ciafé la maturité gnarál insigné materies dla formaziun generala. Les porsones interessades messará fá n curs de amisciun che reverda materies generales sciöche todësch, matematica, talian y inglesc. Por tó pert al curs cina al 1 de setëmber él nezesciar da avëi n contrat de lernerat. Chësc curs sará partí sö te dui agn cun les ores de leziun ti pröms trëi semestri le vëndres y la sabeda y le cuarto semester ince la jöbia. Le datur de laur á ince te chësc caje düc i vantaji presënc te n contrat de lernerat tradizional, mëss indere ti dé lëde al lernert tratan les ores de leziun. Le lerner da süa pert é oblié da tó pert regolarmënter ales leziuns.
Al podará to pert a chësc curs de dui agn de preparaziun al ejam de maduranza düc i studënc che á ciafé n diplom de lernerat tles profesciuns de eletrotecnich, tecnich dla comunicaziun, mecatronich, zipladú de marmor, muradú, zumpradú de lëgn, tistler, feur, magnano, atrezista, mecanich y grafich multimedial. Por plü informaziuns preibël contaté diretamënter la scora profescionala por l’artejanat y l’industria de Balsan, Tel. 0471 540703; E-mail: Rosy.Piaia@Schule.suedtirol.it o ince: www.provinz.bz.it/berufsbildung/ausbildung/1914.asp.
USP
Galaria dales fotografies
Foto: USP/Ingo Dejaco
