Atualità
Dala Junta: aprová 6,6 miliuns por stipendiums
La Junta provinziala á aprové döes bandides por 2177 stipendiums por jogn che mëss vir demez da ciasa por motifs de stüde.
La Junta provinziala á aprové incö danmisdé (ai 18 de ma) döes bandides por la conzesciun de stipendiums por söporjö duemile studënc che mëss vir demez da ciasa por motifs de stüde tl ann scolastich 2017/18. “Al é preodü na spëisa complessiva de 6,6 miliuns de euro – á dit le presidënt Arno Kompatscher – y al se trata insciö de n investimënt ampl che desmostra tan importanta che al é por nos da ti dé a düc i jogn les medemes posciblités da se cherié n dagní.”
La pröma bandida prevëiga la metüda a desposiziun de 6,2 miliuns de euro por indöt 2060 stipendiums por n import singul de al mascimo 2.800 euro por i studënc dles scores altes y che frecuentëia n curs de formaziun profescionala tles scores d’agricoltöra y de economia domestica. Les domandes mëss gní menades al Ofize Assistënza scolastica, strada Andreas Hofer 18, a Balsan cina ai 28 de setëmber. Al röia ciamó lapró 117 stipendiums da 2800 euro, por na soma totala de 355mile euro, che vëgn metüs a desposiziun por i scolars de scores elementares o mesanes che mëss studié demez da ciasa. Te chësc caje mëss les domandes gní presentades cina ai 21 de setëmber.
USP
