Atualità
Contrast: daurida la mostra nöia cun 13 artisć ladins
Cun na vernissage él incö ai 4 d’agost gnü daurí la mostra “Contrast” tl Istitut Ladin Micurá de Rü a San Martin de Tor.
Tres le conzet prinzipal dla mostra nöia "Contrast", organisada dal Istitut Ladin Micurá de Rü en colaboraziun cun l’EPL (Ert por i Ladins), dessél gní sotrissé les particolarités de na cossa, de n oget. "Sc’al ne foss nia la nöt n’aprijasson nia le de, zënza la mort n’ess la vita nia chë gran valüta, y zënza le vërt n’ess le cöce nia la medema faziun", insciö él da lí tla descriziun ofiziala tematica dla mostra curada da Verena Malfertheiner y Katharina Moling. La parora contrast, che vëgn dales espresciuns latines contra y stare, descrí valch che resaltëia, dal momënt ch’ara ti dá forma a na oposiziun o a na contradiziun. Ci che ares á deboriada é che süa forza d’espresciun vëgn renforzada dal confrunt. Por chësta mostra él gnü chirí fora trëdesc artisć, danter chi che s’á dé jö cun la tematica dl concurs 'Contrast'. "Les operes dades jö evidenziëia la varieté de manires desvalies te chëres che i contrasć pó gní a löm", spliga les curadësses Malfertheiner y Moling.
I artisć y sües operes
Les operes de Markus Moling é caraterisades da contrasć formai. I depënc de Albert Mellauner mostra sciöche n contrast pó ince gní a s’al dé tres na contraposiziun de corusc, fajon referimënt a na contradiziun ch’an pó avëi daite. N contrast vëgn ince fora dales linies tleres y stersces dles siluëtes de Franz Irsara, dala simulaziun de movimënc y de profondité di depënc de Sara Dapoz y dal’interaziun danter materialité y dimenjiun dles scultöres de Christine Runggaldier. Tles operes grafiches de Josef Irsara se desfantëia i contrasć otics danter les linies, tres n spostamënt apëna da odëi da man dërta cuntra man ciampa y dal alt cunra le bas. Ince les operes tesciüdes de Martina Stuflesser, che soga artisticamënter cun le contrast di corusc, mostra sö n contrast che alda lapró; la descrepanza danter le valur ch’i ti dun a n toch de guant y le laur ch’al é da le fá. Le video de Pierangelo Giacomuzzi - Treefisters spliga l’antagonism de dui monns, che depënn impó un dal ater. Pro le retrat realistich de Gabriele Grones y les püces righes di dessëgns, che pé tl pröm momënt daldöt naturales mo impó dër avisa, de Giuliana Castlunger, dál imënt ch’al sides na contradiziun danter le motif y le cheder sön chël che l’opera è gnüda realisada. Tles fotografies de Gustav Willeit devënta le soget instës fontana dla contradiziun. Pro l’istalaziun de Michael Moling, vëgn le tema fora simbolicamënter, dal momënt che l’artist mët adöm döes sferes en contrast danter ëres. Tla scultöra de Matthias Sieff ciafa le contrast forza dala tenjiun che vëgn a s’al dé tl jüch danter les proporziuns y l’assialité dl corp.
La mostra restará daverta dai 05 ai 25 de agost, dal lönesc ala sabeda tres dales 10.00 ales 12.00 y dales 16.00 ales 19.00. La domënia podarán vijité la mostra 10.00 ales 12.00. Por de plü informaziuns: http://micura.it/la/
USP
