Atualità
Euregio: Mostra culturala “Lën” de artisć ladins da odëi a Trënt
Cina ai 17 de setëmber sarál da odëi la mostra culturala “Lëgn” tla Galaria civica de Trënt. L’Euregio á ince publiché n video sön süa plata internet.
L’ofize deboriada dla Euregio Tirol-Südtirol-Trentin á publiché sön süa plata internet n video sön la mostra cun operes de lëgn “Lën-Legno-Holz” por promöie la scomenciadia culturala y la presenté a n publich plü ampl. La “Galaria zivica” dla cité de Trënt, che fej pert da trëi agn dl Museum de ert moderna Mart de Rovereto, ospitëia de plü scoltöres de lëgn realisades da 15 artisć de Gherdëna. Les scultöres de lëgn á na posiziun lëdia y originala tl panorama dl'ert contemporanea y te chësc contest él da alzé fora dantadöt le laur di artisć dla Val Gherdëna cun na scora che por süa cuantité y cualité é unica t’Europa. Tla mostra a Trënt sarál dantadöt da odëi l’evoluziun dla lauraziun dl lëgn tl vers de n’interpretaziun contemporanea.
Al sará da odëi indöt 40 scultöres de Livio Conta, Giorgio Conta, Fabiano de Martin Topranin, Aron Demetz, Gehard Demetz, Peter Demetz, Arnold Holzknecht, Walter Moroder, Herman Josef Runggaldier, Andreas Senoner, Peter Senoner, Matthias Sieff, Adolf Vallazza, Willy Verginer y Bruno Walpoth.
La mostra é curada da Gabriele Lorenzoni y gnará ince acompagnada da na publicaziun de n catalogh por ladin, todësch y talian. L’esposiziun culturala é gnüda a se le dé por merit dla colaboraziun cun le Museum Ladin Ciastel de Tor y la Galaria Doris Ghetta da Urtijëi.
Le video realisé por l’ocajiun dal Ofize dl’Euregio inviëia düc da jí a ti ciaré ala mostra. La Galaria Zivica de Trënt á süa sënta tla strada Via Belenzani 44 y é daverta dal mertesc ala domënia dlaes 10.00 ales 13.00 y dales 14.00 ales 18.00. Le lönesc él le dé de palsa. La galaria sará ince daverta ai 15 d’agost. Por de plü informaziuns: http://www.mart.tn.it/legno
USP
Galaria dales fotografies
