Atualità
Prosa y teater: Concurs leterar "SCRIBO"
La Repartiziun Cultura y Intendënza ladina scrí fora n concurs leterar por les porsones apascionades de leteratöra. An pó dé jö l'opera cina ai 31 de ma dl 2018
Sostigní la leteratöra ladina, motivé i jogn da se dé jö cun la scritöra y arichí l repertoire de operes leterares ladines: chisc é i fins prinzipai dl concurs leterar “SCRIBO” (che vëgn dal latin y ó dí “iö scrii”) organisé dala Repartiziun Cultura y Intendënza ladina dla Provinzia. Le concurs é dediché ales döes seziuns prosa y teater y dötes les modalités por tó pert é online. “La leteratöra ladina é via y chësc é n bun segnal che desmostra che i tröc investimënc te chësc ciamp porta de bugn früc. Cun chësta scomenciadia orunse motivé düc i auturs y dötes les auturies da scrí ladin y da arichí insciö nosc panorama leterar”, spliga l’assessur por la scora y cultura ladina Florian Mussner.
Mark Twain dijô “ Scrí é saurí… an mëss ma lascé demez les paroles falades”…"sambëgn é le scrí n prozes comples che porta les auturies y i auturs a se dé jö cun plü aspec de chësta ert, le contignü, la forma y sambëgn ince le lingaz, döt chësc te n prozes creatif. Cun chësc concurs orunse dé n impuls y motivé düc chi che se dá jö cun chësc prozes. I ti aodi a düc chi che tolará pert al concurs ligrëza da scrí y suzes" insciö le Diretur dla Repartiziun Cultura ladina Felix Ploner.
Informaziuns d’ütl
Al concurs leterar pól tó pert düc chi che sá da scrí te öna na varianta ladina dles valades dl Sela (badiot, gherdëna, fascian, ampezan o fodom). Le concurs leterar é partí sö te döes seziuns. La seziun junior é por i auturs y les auturies danter 16 y 25 agn, chëra senior é por düc i auturs y les auturies de passa 25 agn. Pro le concurs pól gní dé jö operes che fej pert dles seziuns prosa y teater. I auturs y les auturies pó chirí fora la tematica de süa opera.
I tesć dá jö mëss ester originai, scric por ladin y ne pó nia bele ester gnüs publicá. Les traduziuns de operes bele publicades te d‘atri lingac ne vëgn nia azetades. Vigni autur y vigni auturia pó ma dé jö öna n’opera. Al ne vëgn dé dant degun limit de parores.
Le concurs leterar junior ti gnará ince presenté ales scores altes por chirí la colaboraziun cun les scores altes ladines.
Por vigni seziun vëgnel preodü dui pesć: le pröm pest de 3.000,00 euro y le secundo pest de 2.000,00 euro. Che che tol pert al concurs mëss dé jö cina ai 31 de ma dl 2018, dales 12.00, na copia de so laur pro le secretariat dl concurs. Le laur pó gní ortié tres lëtra racomanada cun avis de recioiüda (al vel la data dl timber dl ofize postal) o tla forma digitala a chësta misciun culturayintendenzaladina@pec.prov.bz.it.
Por de plü informaziuns:
USP
