Atualità
Consultes dla Jonëza: L’interes ala politica odü dai jogn
Incuntada deboriada dles trëi consultes provinziales dla jonëza en sabeda a Balsan: al é gnü debatü di proiec portá inant y dla relaziun danter politica y jogn.
Co amplié l’interes di jogn ala politica comunala, provinziala y internazionala? Co fá avarëi les minunghes y porté inant proiec deboriada? Cares sará pa les sfidades tl dagní por la politica jonila? Chisc é d’atri temesc é stá tl zënter dla reuniun dles trëi Consultes provinziales dla jonëza dan da püch a Balsan. Les trëi consultes ladina, todëscia y taliana é gnüdes istituides tl forá dl 2015 y gnará renovades do da trëi agn, chël ó di ti pröms mëisc dl ann nü 2018. Insciö é ince chësta incuntada deboriada stada n pü n ocajiun da fá n ressüme dles cosses fates y da ponsé ales sfidades futures. La proscima inciaria dorará dal 2018 al 2020.
Florian Pallua, responsabl dl proiet AFZACK y Bianca Elzenbaumer dl proiet Quercialab á tigní dui referac sön formes de interaziun garatades adöm ai jogn y ales jones, sön co motivé la jonëza da fá para a proiec y colaboré. Do i dui referac él gnü organisé mëses torones de discusciun sön tematiches desvalies, dala “Piattaforma Festival delle resistenze” al Sorvisc de Formaziun, passan por les propostes de colaboraziun danter les consultes rovan ala scomenciadia „Brave New Alps“. Lena Mulser dla Consulta di Jogn ladina á coordiné la mësa de discusciun sön l’orientamënt futur dla colaboraziun dles consultes, olache al é gnü fora ince le dejider da avëi plü pëis tla discusciun politica.
USP
