Atualità
Canche i mituns mët man da baié tert: sëra ala Teßmann
Les problematiches tratan le svilup dl imparé da baié pro i mituns sará le tema zentral de na conferënza publia en mercui ai 29 tla biblioteca Teßmann da Balsan
La pröma parora de n möt é öna dles plü beles esperiënzes por i geniturs. Cun dui agn adora la maiú pert di pici mituns bele incër 50 parores y forma frases de döes parores. N valgügn indere é n pü' plü intardiá cun le svilup dl lingaz co mituns dl medemo tëmp. Ai mituns pro chi che al n'é nia na rajun organica por chësc - sciöche por ejëmpl n problem cun l'aldí - ti dijon "late talker", mituns che baia tert. Na pert de chisc mituns recuperëia completamënter le lingaz plü tert. Datrai indere pól ince ester le pröm sëgn de n desturb dl svilup linguistich.A chësta problematica ti él dediché na sëra d’informaziun tla Biblioteca provinziala Dr. F. Teßmann da Balsan en mercui, ai 29 de novëmber, dales 20.00 inant.
La logopeda Tanja Penz spliga te so referat vare por vare sciöche le svilup linguistich de n möt vëgn a s'al dé, canche i geniturs dess damané consëis y aiüt a esperc y sciöche ai pó sostigní so möt da imparé n lingaz tres n ambiënt incëria de promoziun linguistica. Le referat sará por todësch, l'entrada é debann.
La referënta Tanja Penz é logopeda tla Clinica universitara por desturbs dl aldí, dla usc y dl lingaz (Universitätsklinik Für Hör-, Stimm-, Sprachstörungen) da Desproch. La scomenciadia vëgn organisada dala Biblioteca provinziala Dr. F. Teßmann deboriada cun l'Ofize linguistich dl Istitut cultural dl Südtirol.
USP
