Atualità
La scola ladina prejenteda a Cividat dl Friul
Tl cheder dl cunvëni europeich “RUSH” (Re and Up Skilling Horizons) iel unì prejentà a Cividat (Cividale - Friuli) dal Intendënt Verra l model scolastich ladin.
L proiet RUSH ie na azion tl cheder dl program europeich Erasmus+ che sustën la scumenciadives tl ciamp culturel y educatif tla Union Europeica. L se tol dant de cunfrunté de bona pratiches de scoles te raions de mendranza dla Talia, dla Croazia y dla Spania y de ruvé ala eleaborazion de n model de formazion de nsenianc te n cheder plurilingual.
L diretëur dl ARLEF (Ajenzia per l lingaz furlan) William Cisilino à ulù nvië te chësta ucajon l Intendënt Ladin a prejenté la bona pratiches de na scola paritetica y plurilinguela tl raion ladin che possa festejé chëst’ ann i 70 ani dala istituzion dl 1948. Te si referat à Roland Verra purtà dant la fundamëntes giuridiches y pedagogiches dl model scolastich ladin, metan man cun la esperienzes plurilingueles tla scolina y ruvan ala alfabetisazion trilinguela tla prima tlass dla scola elementera, per jì ite depona plu avisa sun l funzionamënt dl model paritetich a uni livel de educazion.
Na gran lerch te si referat à l Intendënt Verra dedicà al tema relevant dl cunvëni, chël dla formazion di nsenianc ladins y a chël di recuisic fundamentei per pudëi lauré te n cheder plurilinguel, dantaldut chël dla zertificazion dla cumpetënzes tl ladin, tl talian y tl tudësch.
I esperc presënc, che univa da deplu universiteies europees y dala scoles dl raion furlan, à valutà l model ladin danter la pratiches de suzes tl ciamp plurilinguel y l ie stac truepes intervënc y dumandes de n publich scialdi nteressà ala esperienzes dla scolines y scoles ladines.
Da auzé ora particularmënter iel stac i intervënc dl professëur Giovanni Agresti dla Università Federico II de Napoli sun l plurilinguism sciche valëur europeich y dl Professëur Michele Gazzola dla Università Humboldt de Berlin sun l sustëni europeich ai lingac de mendranza.
La culaborazion danter scoles ladines dla Dolomites, dl Friul y di Grijons dëssa jì inant nce ti ani che à da unì.
USP
