Atualità
Stipendiums, 5 miliuns a desposiziun
La Junta provinziala á aprové 5 miliuns por i stipendiums. Implü él ince gnü alzé le limit dl davagn “depuré” da 25.000 a 28.000 euro.
Cun l’aprovaziun dla delibera da incö ai 26 de jügn á la Junta provinziala alzé le limit dl davagn “depuré” por ciafé stipendiums da 25.000 euro a 28.000 euro. Löm vërda ince por la soma de 5 miliuns de euro por la conzesciun de stipendiums a bëgn di scolars y dles scolares che mëss vire aldinfora da ciasa por gaujies de stüde tl ann scolastich 2018/19. “I stipendiums é n stromënt important por garantí l’avalianza de azes al istruziun”, sotlignëia l’assessur por la scora todëscia Philipp Achammer. Cun le limit plü alt por le davagn dess de plü scolars avëi la poscibilité da fá domanda y da ciafé n sostëgn finanziar, insciö Achammer.
La mosöra reverda i scolars dles scores d’oblianza (398.000 euro) y dles scores altes (4,6 miliuns) y chi che frecuentëia curs de formaziun profescionala te scores agrares y de economia aziendala. I imporc di stipendiums vá dai 1.200 ai 2.800 euro aladô dl davagn “depuré”. Por i studënc pendolars él preodü n import unitar de 300 euro. Les domandes pó gní fates tres l’Ofize Assistënza scolastica, strada Andreas Hofer 18, a Balsan cina ai 27 de setëmber.
USP
