Atualità
Löm vërda dala Junta por le program anual dl Sorvisc por la Jonëza
La Junta provinziala á aprové ai 26 de forá le program 2019 por la promoziun dl Sorvisc por la jonëza ladina - nvestimënc por indöt 369.400 Euro.
Aprovaziun da pert dla Junta provinziala al Plann anual 2019 por la promoziun dl Sorvisc Jonëza dl grup linguistich ladin de Gherdëna y dla Val Badia. "Les organisaziuns joniles á na gran importanza por l’aspet sozial tratan le svilup dles jones y di jogn te nostes valades. Cun le program aprové orunse garantí n’oferta ampla de scomenciadies por i mituns y i jogn söl post, a na manira che ai pois adoré so tëmp lëde por se formé inant", spliga l’assessur por la scora y cultura ladina Daniel Alfreider. Les organisaziuns joniles, che dess ester post d’incuntada y d’interaziun, é ince de gran valüta por döta la sozieté, deache ares se crüzia de na buna formaziun dles generaziuns che vëgn docá, spliga Alfreider.
Un di faturs prinzipai dl program é la promoziun dl’ativité, i programs y le laur a proiet. Por la promoziun dles ativités y di programs pro le grup linguistich ladin él gnü aprové 300.000 euro por ci che reverda les spëises ordinares de personal y formaziun. Un di punc zentrai dl plann é l’ampliamënt, aredamënt y la dotaziun dles infrastrotöres dl sorvisc ai jogn. Por la realisaziun y l’aredamënt dles infrastrotöres tl Sorvisc jogn por le grup linguistich ladin él preodü chësc ann 58.000 euro. Na pert di investimënc é preodüs por la restrotoraziun de n local por i jogn a Santa Cristina, implü vëgnel ince metü a desposiziun na soma por l’aredamënt dl local di jogn a Antermëia y por le local dles proes dla musiga a La Ila tl zënter di Jogn "Sajun". N proiet important, olache i laurs de costruziun metará man d’aurí dl 2019, é le ressanamënt dla Ciasa sön Börz destinada ala jonëza y ales families. La costruziun nöia vëgn realisada adöm cun le Laur por la jonëza dl grup linguistich todësch, le Sorvisc por la jonëza dl grup linguistich ladin, la Ploania da Balsan y contribuc da pert de privac.
N ater aspet important é chël dla realisaziun de archirides scientifiches. Implü él ince le Departimënt Scora y Cultura ladina che pita n program aposta che tól ite iadi de stüde por i colaboradus di sorvisc, i laurs dla Consulta Jogn y tröp d’ater. Por chësc program dla Repartiziun 18 él preodü n investimënt de 11.400 euro.
USP
