Atualità
Scolines y scores te Gherdëna: Tröpa profescionalité
Pro la vijita dles scores y scolines te Gherdëna dl assessur por la scora ladina nen éra jüda dles desfidades dl personal insegnant y dles educadësses y di educadus, y di bojëgns dles mitans y mituns.
L'assessur provinzial por la scora ladina y l'intendënta dles scores ladines Edith Ploner é stá ai 9 de ma tla scora mesana nöia a Sëlva, tla scora elementara a Santa Crestina, tla scolina Salieta a Ortijëi y tla Direziun dles scores a Ortijëi. Pro incuntades cun le personal dirigënt y insegnant, cun les educadësses y i educadus y sambëgn ince cun les mitans y i mituns s'á l'assessur provinzial fat n cheder dles ghiranzes d'aldedaincö ales istituziuns formatives.
„Por nostes mitans y nüsc mituns é la scolina y la scora, dlungia i geniturs, bonamënter le pilaster plü important por n svilup de suzes y por s'arjigné al dagní. Al me fej plajëi da odëi cun tan de profescionalité y pasciun che al vëgn lauré tles scores y tles scolines“, á dit l'assessur provinzial por la scora ladina dal'incuntada. Les ghiranzes devënta tres maius por les porsones che laora tl ciamp dla formaziun, porchël desson ciafé adöm cun dötes les porsones che laora tl monn dla formaziun de mius condiziuns cheder por le dagní, a na moda che chëstes profesciuns sides tres plü interessantes, á dit l'assessur provinzial.
Dl valur dl’abilité manuala y dantadöt ince dl movimënt por porsones che crësc nen éra jöda tla scora mesana a Sëlva, olache l'assessur provinzial y la direturia dla scora Claudia Schrott á fat na roda fora por i laboratori y les palestres. Tl frabicat renové daldöt dan da val' agn impara al momënt 141 scolares y scolars.
Le plurilinguism é sté le tema zentral tla scora elementara a Santa Crestina, olache l'assessur provinzial s'á informé pro les direturies dles scores Susanna Comploj y Irmgard Perathoner sön la scora elementara da 103 scolares y scolars. Pro les particolarités dla scora ladina alda sciöche i savun le model scolastich paritetich, chël ó dí l'insegnamënt por ladin, talian y todësch pian ia dala pröma classa dla scora elementara.
Sciöche l'aprendimënt dl lingaz vëgn a se le de pro de pices mitans y de pici mituns, che ne baia nia ma so lingaz dla uma tla scolina ladina, mo ince todësch y talian, á splighé la direturia dla scolina ladina Hannelore Insam y la cordinadëssa dla scolina da Ortijëi Alexandra Insam tla scolina „Saliëta“. Les rapresentantes dles scolines á cunté che la formaziun permanënta y tröc proiec á porté pro ti ultimi agn a mioré cotan la competënza linguistica y musicala dles mitans y di mituns. Tles scolines ladines laoron tres deplü cun programs adatá avisa ai mëndri, á cunté la direturia dles scolines. Les scolines ladines dl comun de Ortijëi tol ite al momënt set seziuns partides sö sön döes scolines; chëres tl comun de Ciastel trëi seziuns partides sö sön les scolines de Sureghes y Runcadic.
Cun la direturia dla Direziun dles scores de Ortijëi Maria Kostner y la vize-direturia Flavia Lardschneider á l'assessur provinzial y l'intendënta baié dla colaboraziun cun i geniturs. Kostner y Lardschneider á cunté che la scora mëss tres plü gonot surantó ince compic che reverda l'educaziun. Tla scora elementara da Ortijëi él sëgn 298 scolares y scolars, te chëra da Runcadic n'él 38 y tla scora mesana da Ortijëi nen él 248.
Che l'inclujiun y le svilup educatif cun les mitans y i mituns de emigrá y cun chi che á problems adora ciamó de plü ressurses, él gnü dit pro dötes cater les incuntades. Implü él ince desfidades liades ai media nüs y ales situaziuns familiares che se müda, por ejëmpl sce i geniturs se despartësc, él gnü dit dales incuntades. Tres na bona preparaziun, la formaziun y tröp impëgn vára da fá tröp, sön chësc ê les rapresentanzes dla scora y scolina a öna pro les cater incuntades.
USP
Galaria dales fotografies
