Atualità
Mesc storics te Gherdëna: Regiun y Provinzia sostëgn le proiet
Por sensibilisé la jënt sön l’importanza storica di mesc da paur de Gherdëna, mët a jí le Museum Gherdëina le proiet "Mejes". Regiun y Provinzia sostëgn l'archirida de soluziuns por mantigní i mesc.
Cina ai 31 de jená dl 2020 él tl Museum Gherdëina a Urtijëi la mostra "Mejes de Gherdëina – La memoria de na cuntreda". L'assessur regional Manfred Vallazza é jü a ti ciaré dan da püch. "Ciaré de nosta contrada, sciöche ince de nüsc bi mesc da paur tradizionai, é danter i compic plü importanc de chi che i me cruziará ti proscimi agn sciöche rapresentant dla mendranza ladina", á dit l'assessur regional da süa vijita. Da baié cun i responsabli dl proiet él gnü ponsé a poscibilités de sostëgn concretes desvalies. Al dess gní sostigní inant le laur de inrescida por amplié le savëi sön i mesc storics. Implü dessel gní sensibilisé, insciö Vallazza, i injiniers, i architec y i geometri por ci reverda la belëza y l'importanza di mesc.
Ince l'assessur provinzial por la cultura ladina Daniel Alfreider ti á lascé alsavëi so sostëgn al Museum Gherdëina. Canche al á baié cun i responsabli dl proiet ál garantí che ince la politica provinziala conësc le problem dl se desfanté bel plan de n patrimone cultural y architetonich. Al mëss gní chirí soluziuns por mantigní i mesc storics che á te Gherdëna cina passa 700 agn y porchël ó la Provinzia lauré adöm cun le Museum, á dit Alfreider. "I vedli mesc mostra ince sö la vita da paur di antenac ladins y é porchël n patrimone cultural important por i ladins", á sotrissé Alfreider. An podess por ejëmpl motivé le mantignimënt di mesc tres la surnadada de n’onoranza por de bugn proiec, sciöche al é gnü fat pro le pest por les viles tla Val Badia, insciö l’assessur provinzial.
Sce ara nen vá dl mantignimënt di mesc él dër important da ciafé partners tla politica y tl’aministraziun, da chirí poscibilités inovatives por i adoré y da sostigní sü patruns, á dit la presidënta Marie Theres Thaler y la direturia dl Museum Gherdëina Paulina Moroder.
Sön trëi alzades dess chësc proiet "Mejes – Mejes de Gherdëina. La memoria de na cuntreda" mostré sö les particolarités y le valur di mesc de Gherdëna. Da öna na pert dessel gní a se le dé n dialogh danter politica, aministraziun, patruns y esperc. Dal’atra dessel gní mostré i mesc cun de beles fotografies a blanch y fosch dl fotograf conesciü Václav Šedý. La mostra pîta n azes visual y emozional, ara sotrissëia la belëza di mesc y fej odëi ci che jiss pordü da i trá jö, insciö le ideadú dl proiet Wolfgang von Klebelsberg. Te n catalogh dla mostra, dé fora dala ciasa edituria conesciüda de Milan Officina Libraria, vëgnel mostré sö i mesc cun fotografies.
La mostra "Mejes", cofinanziada dala Regiun y dala Provinzia, é da odëi tla ciasa dla cultura a Urtijëi, y plü avisa d’isté dal lönesc ala sabeda dales 15.00 ales 18.00 y la domënia dales 10 ales 12:30. L’entrada é debann.
USP/ti
Galaria dales fotografies
