Atualità
Ressurses implü por valorisé la scora y cultura ladina
De plü proiec y investimënc é gnüs finanziá cun le bilanz de assestamënt 2019 tl ciamp dla scora y cultura ladina.
Cun le bilanz de assestamënt 2019 á le ciamp dla scolina/scora y cultura ladina ciafé lapró n import total de 465.000 euro. "Chëstes ressurses ajuntives á na gran importanza por döta nosta comunité ladina, deache al pó gní realisé de plü proiec tles scolines y scores, mo ince tl setur dla promoziun di jogn y tl ciamp", á dit l’assessur por la scora y cultura ladina Daniel Alfreider. Promöie le svilup dles tecnologies digitales, le lauré pratich y dl mangé sann é priorités por nostes scolines y scores, sön chëres che i laorun inant dassënn, insciö Alfreider. Por merit dla buna colaboraziun de n valgünes direziuns dles scolines y scores dles valades ladines, de Alexander Piccolruaz cun so team sciöche dla Consulta culturala ladina y dla Consulta di Jogn ladina él sté poscibl da realisé de plü proiec. Ince por la direturia dl’Intendënza y Cultura ladina Edith Ploner él sté poscibl "cun la dotaziun dl bilanz de assestamënt da mët en pratica investimënc te strotöres, proiec culturai y proiec straordinars dles scolines y scores che ne ess nia podü gní realisá cun le bilanz ordinar. De chësc ti é le monn dla scora y cultura reconoscënt al assessur che s’á impegné por chësc finanziamënt lapró tl ann 2019."
Tl ciamp dla cultura y jogn é gnü assegná por proiec culturai straordinari zirca 40.000. Euro, implü röiel lapró 40.000 euro por strotöres culturales por i jogn ladins a Balsan, Porsenú y Bornech. Implü vëgnel finanzié cun 100.000 euro la restrotoraziun dla ciasa di jogn sön Börz (Alpines Jugendhaus), che é de proprieté dla dlijia y che gnará gestida dal sovrisc ai jogn dla Val Badia.
Tl ciamp dla scolina y dla scora él gnü metü a desposiziun cun le bilanz de assestamënt indöt 285.000 euro. Na gran pert é jüda sciöche assegnaziun straordinara ales scores por proiec didatics y por investimënc. Cun chëstes ressurses él gnü cumpré computers, tablets y notebooks por les scolines.
Tl ambit dl proiet "alimentaziun sana" é gnü comprá mascins da majiné la bla por dötes les scolines. Implü é gnü pitá deplü cursc de sport te deplü disciplines tles scolines y tles scores y ince cursc de informatica. Proiec de integraziun á podü éster aumentá, por ejëmpl le proiet "Welcome box" che é n pacl de sostëgn cun informaziuns por les mitans y i mituns cun background de migraziun che röia te na scora ladina.
USP/USP
Galaria dales fotografies
