Atualità
Scora ladina: Educaziun zivica, mudaziun dles indicaziuns provinziales
La Junta provinziala á aprové la mudaziun dles indicaziuns provinziales por l'introduziun di programs de insegnamënt de educaziun zivica.
Educaziun a na zitadinanza ativa, ales competënzes digitales, ala proteziun dla sanité y ala sostenibilité: chisc é danter l'ater i fins dla introduziun dl insegnamënt de educaziun zivica tl sistem scolastich ladin. La forma nöia de insegnamënt é gnüda adatada ales esigënzes dla scora ladina cun mudaziuns aprovades dala Junta provinziala en mertesc ai 16 de aurí sön proposta dl assessur por la scora ladina Daniel Alfreider. “L'insegnamënt dla educaziun zivica sará na forma de sostëgn por ti dé tles mans a nüsc scolars les massaries nezesciares por capí le funzionamënt di vantaji dla digitalisaziun, dla mobilité y dla zitadinanza ativa”, spliga l'assessur Alfreider. Al ne gnará nia a se le dé ores implü tl curriculum scolastich, mo na integraziun dl insegnamënt tles atres materies, sciöche preodü dala normativa statala, insciö Alfreider. L'intendënta Edith Ploner sotlignëia che “la educaziun zivica tól ite na seria de temesc che gnará adatá a vigni livel de formaziun. Le fin é chël de arjigné ca i mituns y les mitans ala sozieté. Chësc é n fin comples che se damana da jí sura les singoles materies fora, porchél ál ince orü ester n adatamënt dles indicaziuns provinziales”.
Por ci che reverda l'insegnamënt dla educaziun zivica ne se tratel nia de na materia aposta, mo al gnará a se le dé n insegnamënt integré te atres materies. L'introduziun reverda vigni livel scolastich. Al é preodü almanco 33 ores de insegnamënt al ann, mo al ne gnará nia aumenté les ores curiculares tratan l‘ann. Al sará preodü na valutaziun ala fin dl ann.
Por ci che reverda i temesc dla educaziun zivica tles scores ladines él gnü stabilí 8 seturs desvalis. Al se trata de personalité y sozial, cosciënza culturala, politica y dërt, economia y finanzes, sostenibilité, sanité, mobilité y digitalisaziun. La definiziun di temesc é gnüda a se le dé sön la basa dla lege statala interessada y en acordanza cun n grup de laur dla Intendënza y Cultura ladina te na colaboraziun strënta cun la Intendënza todëscia.
USP/rc
