Atualità
100 agn bandira ladina, Alfreider: “Deboriada unse arjunt tröp”
Le vizepresidënt ladin dla Provinzia Daniel Alfreider sotlignëia en gaujiun dl aniversar de 100 agn dla bandira ladina: “Scomenciamënt cun tröpes dificoltés, l'autonomia á garantí dërc importanc”
Ai 5 de ma dl 1920 s'â incunté rapresentanc de 5 valades ladines sön le Ju de Frara por protesté cuntra le fat che i ladins ne ê nia gnüs conscidrá tl Tratat de Paris de San Germain (1919) y che al ne ti ê nia gnü dé le dërt de autodeterminaziun. Pro chësta incuntada êl gnü adoré por le pröm iade la bandira ladina sciöche volonté de unité dl grup linguistich ladin. I corusc rapresentëia le vërt di bosć y pra, le blanch dla nëi y le bröm dl cil.
“Por le grup linguistich ladin é sté le tëmp tratan les döes veres mondiales y cina la fin dla vera dl 1945 caraterisé dales desposiziuns de d’atri, da poverté y soferënza. Ince sce i ladins ne é nia gnüs nominá dala acordanza Gruber-Degasperi dl 1946, él impó sté le scomenciamënt dl percurs dla garanzia de dërc fondamentai tl Südtirol y tl Trentin”, dij le vizepresidënt dla Provinzia Daniel Alfreider. Por merit dl laur plurianual de nüsc antenac laoran sön l'autonomia él sté meso da garantí i dërc ti seturs dla scora y dla cultura ladina, insciö Alfreider.
Tl 1975 él gnü istituí l’Intendënza ladina, tl 1976 l’Istitut cultural Micurá de Rü, tl 1989 l’Istitut Pedagogich ladin, tl 1998/99 la Seziun ladina dla Facolté de Sciënzes dla Formaziun dl’Université de Balsan y tl 2006 la Facolté por Ladinistica. “Sides tl setur dla formaziun che ince tla cultura y di media él la mendranza ladina che á arjunt tröp, por lauré inant te chësta direziun”, insciö Alfreider. Sciöche ince le barometer di lingac dl ASTAT á confermé tl 2014, vëgn le lingaz ladin adoré tla vita da vigni de dal 82,2 porcënt di abitanc te Gherdëna y dal 93,6 porcënt di abitanc dla Val Badia. Implü él 88 porcënt di intervistá che á confermé da adoré le ladin tratan le laur. Cun l'organisaziun dl’Europeada tl 2016 tl Südtirol y tles valades ladines él ince sté meso da sotligné l'importanza de portignënza al grup linguistich ladin tres le sport y la cultura.
Dantadöt te chisc mëisc de dificolté porvia dla defujiun de na pandemia mondiala él important da afronté deboriada i problems y da chirí soluziuns da atué. “I messarun vire adöm ciamó tröp tëmp cun le virus y chësc ará tröpes mudaziuns tla vita da vigni de y söl laur, porchël sunse sigü che i messarun ciafé soluziun nöies por ti ester ala crisa, dantadöt ince tl setur dla cultura, deache propi sëgn él important da ne se desmentié nia da olache nostes raisc vëgn”, stlüj jö l'assessur Alfreider.
USP/ASP
Galaria dales fotografies
