Atualità
Sorvisc d’emergënza por scolines y scores elementares: les dates
Da en lönesc, ai 18 de ma sarál atif le sorvisc de emergënza tles scolines y scores elementares cina la fin dl ann de scora ai 16 de jügn. L’isciriziun sará poscibla ma indoman, ai 13 de ma.
La Junta provinziala á stabilí incö ai 12 de ma i detais por l’istituziun dl sorvisc de emergënza por mitans y mituns dles scolines y dles scores elementares. “Al é n sorvisc de emergënza che vëgn metü a desposiziun por geniturs che laora te sorvisc essenziai. Tratan le sorvisc gnarál garantí la segurëza sanitara plü alta poscibla sides por i mituns co ince por le personal”, dij l’assessur por la scora ladina Daniel Alfreider. Do che al é gnü istituí la basa iuridica dl sorvisc cun la lege provinziala nöia él incö gnü stabilí i criters de amisciun y l’organisaziun dl sorvisc d’emergënza che metará man da en lönesc, ai 18 de ma. Al gnará partí sö te pici grups da 4 (por mituns cina 6 agn) y da 6 (por mituns da 6 agn insö). Vigni grup gnará acompagné da maestres dla scolina o dla scora elementara.
Assistënza dales 8.00 ales 12.30 - Iscriziuns ma indoman, ai 13 de ma
Chi che ó fá l’iscriziun por le sorvisc d’emergënza messará compilé le formular che an pó ciafé da indoman, ai 13 de ma (dales 00:01 inant) sön la plata internet dl Departimënt Intendënza y Scora ladina sot a: http://www.provinzia.bz.it/la/sorvisc-a-z.asp?bnsv_svid=1036864.
Le sorvisc d’emergënza é por geniturs che laora trami dui y che ne á degöna poscibilité de assistënza. I geniturs ne pó avëi degöna poscibilité da fá home office o smart working. Tratan le tëmp d’assistënza mëss trami dui i geniturs laoré. Al vëgn ince tut en conscidraziun mituns che á na situaziun familiara precara o che vëgn acompagná da n sorvisc sozial. Ince mituns y mitans cun handicap acompagná da na colaboradëssa o n colaboradú por l’integraziun pó se anuzé de chësc sorvisc.
Valutaziun dles domandes
Na comisciun, de chëra che al fej pert rapresentanc dles direziuns dles scolines o scores y di comuns, analisará les domandes por fá na gradatöra dles mitans y di mituns ametüs al sorvisc d’emergënza . Al ciafará priorité plü alta i geniturs che laora ti seturs dla sanité, dla cura, dla segurëza publica, dla proteziun zivila, tl setur dles mangiaries y tl setur dl sorvisc d’emergënza. Sce les domandes sará plü altes dla capiënza spo él tla scolina i mituns plü vedli y tla scora i mituns plü jogn che ciafará la priorité. Al gnará ince tut en conscidraziun sce al se trata de mituns dla medema familia.
Sorvisc d’emergënza por mituns cun handicap
I geniturs de mitans y mituns cun handicap dles scolines y scores elementares podará fá domanda de amisciun tla scolina o scora che la möta o le möt é scrit ite. Mitans y mituns dles scores mesanes, altes o profescionales pó fá domanda pro le Sorvisc de inclujiun dla Intendënza ladina. Ince chisc mituns gnará acompagná le danmisdé da colaboradus o colaboradësses por l’integraziun.
USP/USP
