Atualità
Segurëza garantida: sorvisc d'emergënza pëia ia ai 18 de ma
La segurëza de düc é la priorité plü alta pro le sorvisc d'emergënza por scolines y scores che piará ia ai 18 de ma. Les iscriziuns é dan man.
Bele da de plü edemes vëgnel lauré sön le sorvisc d'emergënza tles scolines y scores elementares. Do che al é gnü stabilí i protocols de segurëza cun l'Aziënda sanitara dl Südtirol y debatü adöm ai sindacac, él spo la Junta provinziala che á stabilí ai 12 de ma les regoles por le sorvisc d emergënza tles scolines y scores elementares.
I assessurs por la scora Daniel Alfreider y Philipp Achammer recorda che "al é gnü stabilí adöm a düc i interessá n protocol de segurëza te vigni detai". L'assessur Alfreider dij che “la segurëza dles mitans y di mituns, dlesc scolares y di scolars y de döt le personal pedagogich y scolastich é la priorité plü alta" y Achammer sotlignëia che "chësta pó ince gní mantignida respetan les mosöres de segurëza."
1006 iscriziuns tles scolines, 1322 tles scores elementares
Dötadöm él scrit ite tl Südtirol 1006 mitans y mituns tles scolines tl Südtirol. 56 mitans y mituns sará partis sö te 14 grups tles scolines ladines y 950 mitans y mituns gnará partis sö te 336 grups tles scolines todësces. Por ci che reverda les scores elementares él scrit ite pro le sorvisc d'emergënza indöt 1322 mitans y mituns, de chisc 92 scolares yscolars te 14 grups tles scores ladines y 1230 te 310 grups tles scores elementares todësces. Implü él 64 scolars y scolars cun handicap che s'anuzëia dl sorvisc d'emergënza, cater de chisc tles valades ladines.
Por le sorvisc de emergënza an podü se scrí ite en mercui, ai 13 de ma. Les iscriziuns é gnüdes ejaminades da na comisciun cun rapresentanc dles direziuns dles scolines y dles scores y di comuns interessá. Le sorvisc é debann.
USP/USP
