Atualità
Ejam de maduranza: la regules per l ejam de Stat ie ruvedes
Ai 17 de juni meterà man l ejam de Stat che sarà mé a usc y zentrà sun cin’ materies liedes danter d’ëiles. Na valutazion cumplessivamënter nueva per l ejam de Stat.
N mierculdì, ai 17 de juni dala 8,30, giauriran la portes dla scoles autes te duta la Talia y la studëntes/i studënc puderà fé l ejam de Stat, sambënzënza tenian ite la normes de destanza y cun la prutezion che va debujën aldò dl decret che la scrij dant. Chësta nfurmazions ie unides dates dala ministra dla istruzion, Lucia Azzolina.
L assessëur provinziel dla scoles ladines, Daniel Alfreider, dij che “nosc duvier ie chël de sustenì i jëuni che fajerà l ejam de maduranza, acioche i posse afrunté te na maniera pajëula chësc ejam che sarà a usc. L'emergënza à trat sotsëura l travert che messëssa reprejenté chësc ejam coche pasaje fundamentel dla vita scolastica de uni studënt/a: n ejam cun duta la materies aldò dla pruzedura coche for respetan l percurs che uni maturant/a à purtà inant te 13 ani de scola."
Majer pëis ai ultimi trëi ani de stude tla scola auta
L ejam de maduranza unirà tenì a usc per za. 1 n’ëura da sies nseniantes/nsenianc dl cunsëi de tlas cun la studënta/l studënt; dla cumiscion fejel nce pert na presidënta/n presidënt che vën da dedora. La proa a usc reverda de plu materies che n puderà lië danter d’ëiles. Per la valutazion dl ejam puderà la cumiscion dé de ndut 100 ponc. Per l percurs scolastich ndividuel di ultimi trëi ani de scola auta giaterà la studëntes/i studënc nchina a 60 ponc: dejdot per la terza tlas, vint per la cuarta tlas y vintedoi per la cuinta tlas. Cun i autri 40 ponc uniral valutà la proa a usc ntan l ejam.
Co vën pa fat l ejam?
La proa a usc meterà man cun la descuscion de n lëur scrit arjinià ca dala studënta/dal studënt sun la materies spezifiches dla scola y jirà inant cun la nterpretazion de n test dla leteratura taliana y tudëscia. Pona messerà la candidata/l candidat se dé ju te na vijion nterdisziplinera cun materiai dac dant dala cumiscion. Dla proa a usc fejel nce pert na relazion dla candidata/dl candidat sun si esperienzes de practicum ntan i ani dla scola auta y na descuscion sun temesc liei ala zitadinanza.
Nfurmazions a duta la direzions dla scoles autes ladines
Duta la direzions dla scoles autes ladines unirà nfurmedes ti dis che vën cun na zirculera scrita aposta che cuntën la particulariteies dl ejam, ndicazions plu avisa sun la pruzedura per la valutazion y la normes de segurëza scrites dant.
L assessëur provinziel dla scoles talianes, Giuliano Vettorato, dij che "nce cun de gran deficulteies y cun la mancianza de paroles tleres da pert dl Minister, à la scoles talianes n duvier de gran mpurtanza che n cialerà de fé cun duta la forzes che n à a despusizion: judé cun duc i mesuns, sustenì uni di la studëntes/i studënc, acioche les/i posse ruvé for plu daujin ala proa a usc cun crëta”.
L assessëur provinziel dla scoles tudësces, Philipp Achammer, dij che “i cumponënc dla cumiscion cunësc si studëntes/studënc y sà ciunes che ie la tematiches tratedes ntan l nseniamënt fat da cësa ora tres computer cun la didatica a destanza. Ma l ejam sarà mpo na “verifica sceria dla cumpetënzes y cunescënzes dla candidates y di candidac.”
102 studënc y studëntes tla cuinta tlassa dla scoles autes
Dut adum iel atualmënter scric ite 102 studënc y studëntes tla cuinta tlassa dla scoles autes tla valedes ladines, de chisc ie 23 scric ite tl Lizeum d’ert, 43 tl ITE de Urtijëi, 21 a La Ila y 41 sculeies fej autualmënter la cuinta tlassa di lizeums a La Ila. Tla scola prufesciunela per l artejanat artistich de Urtijëi tulerà un n sculé pert al Ejam de Stat.
USP/USP
