Atualità
Assistënza da d'isté: 42 partezipantes y partezipanc
Indöt 42 volontares y volontars s’á scrit ite cina sëgn al sorvisc de assistënza da d’isté tles valades ladines. L’assessur Alfreider: “N bel segnal de sostëgn ales families”
Por garantí l’assistënza tratan les vacanzes da d’isté á le Departimënt Intendënza y Cultura ladina damané la desponibilité dl personal pedagogich y insegnant por daidé fora laoran sön basa volontara. Indöt él sté 42 volontares y volontars dles scolines y scores ladines che s’á scrit ite al sorvisc d’assistënza da d’isté sön basa volontara. Indöt él 26 volontares che s’á anunzié da Gherdëna y 16 dala Val Badia. Por l’assessur por la scora ladina Daniel Alfreider é chësc n bel segnal de sostëgn ales families te chësta situaziun de crisa: “I sun contënc che la resposta da pert dl monn dantadöt dles scolines sides sté tan ampla. La solidarité da pert dles assistëntes pedagogiches y dles insegnantes y insegnanc é importanta por ti dé na man ales families da organisé i mëisc da d’isté. N rengraziamënt insciö a dötes y düc che dëida para.” Ince l’intendënta dles scores ladines Edith Ploner sotlignëia y valorisëia le bun feedback da pert dl monn dles scolines y dles scores: “La disponibilité da pert dl personal dles scolines y scores é bele gnüda segnalada da n pez, de süa buna da pert de deplü insegnantes y insegnanc ladins, ince bele por le sorvisc volontar tl ciamp sozial de merz”
Desposiziun de segurëza
Scebëgn che al é la crisa Corona él assoziaziuns y uniuns d'ütl publich che mët a jí, en colaboraziun cun cotan de Comuns, ofertes desvalies d'assistënza da d'isté. L'obietif é chël da ester bogn da garantí plü co mai l'assistënza ai mituns de geniturs che mëss lauré tratan le tëmp de vacanza. Ara se trata da öna na pert dles desposiziuns de segurëza y proteziun rigoroses, a chëres che al é sambëgn da ponsé canche an cheriëia l'oferta.
Assiguraziun garantida
Al é gnü stlüt jö n'acordanza cun les organisaziuns sindacales de categoria: le personal pedagogich y insegnant dess s'anunzié de süa bona da dé na man tl ciamp dl'assistënza da d'isté por n tëmp limité, zënza che al vëgnes aziché le contrat coletif. Dötes les colaboradësses volontares y düc i colaboradus volontars che dëida mëte a jí l'assistënza da d'isté vëgn assigurá dal'organisaziun portanta.
Iscriziuns por le sorvisc volontar
Pro le percurs de iscriziun dl sorvisc volontar vëgn i Comuns y les organisaziuns interessades sostignis dales Direziuns provinziales dla Scora ladina y todëscia. Chi che ó ciamó anunzié so interes pó le fá scrion fora le formular che an pó ciafé chilò:http://www.provinzia.bz.it/formaziun-lingac/scora-ladina/la/iste-2020-nos-fajun-para.asp
Al vëgn damané da dé dant avisa la perioda de tëmp y le Comun, olache an oress fá le sorvisc. Les iscriziuns restará davertes cina mez jügn. Les listes cun les volontares y i volontars gnará tresfora ajornades. Düc i interessá gnará spo contatá dai Comuns o dales assoziaziuns che pita le sorvisc.
Por de plü informaziuns: http://www.provinzia.bz.it/formaziun-lingac/scora-ladina/la/iste-2020-nos-fajun-para.asp
USP/USP
