Atualità
La scolina Salieta sará partner dl proiet europeich PLANE
Amplié les conescënzes che reverda le svilup dl lingaz y fá rëi a livel europeich é le fin dl proiet europeich "PLANE" a chël che al fajará para ince la scolina Salieta da Urtijëi.
Le proiet é gnü a se le dé dilan al contribut dla rëi Sweden Emilia-Romagna Network (SERN), na rëi bilaterala che sostëgn les autorités locales y regionales dla Talia y dla Svezia tla elaboraziun y gestiun de proiec regionai, nazionai y europeics.
Le proiet europeich “PLANE – Developing Language in Pre-schools” é gnü aproé dal’Agenzia Nazionala Svedeja y gnará finanzié tres le program europeich Erasmus+ KA2. Le fin dl proiet é chël de mioré, tles scolines che tol pert al proiet la cualité dl aprendimënt en relaziun al tema dl svilup dl lingaz, cun n’atenziun particolara sön l’aprendimënt digital y sön le cunté stories.
Por arjunje chësc fin vëgnel preodü da organisé 3 seminars de formaziun por i partezipanć dl proiet che gnará tignis tla Talia, tla Croazia y tla Svezia y da fá 3 incuntades de coordinamënt che sará de ütl por organisé y monitoré les ativités dl proiet. I partner dl proiet é la scolina "Dječji vrtić" (Brtonigla- Pre- school Calimero Verteneglio - Croatia), la direziun dles scolines Ladinia (Urtijëi) y l'istitut "Istituzione ai servizi sociali "Davide Drudi" (Meldola - Italy)". Le lead partner dl proiet é indere la scolina Bjälbotulls förskola (Mjölby Kommun tla Svezia).
Por l’assessur por la scora y cultura ladina Daniel Alfreider á chësc proiet na valüta importanta deache al renforzëia la rëi internazionala dla scora ladina y mët a confrunt dui aspec fondamentai dla didatica moderna, le plurilinguism y la digitalisaziun. “Les competënzes linguistiches é competënzes essenziales tl monn dl laur y dl’economia, ares é n elemënt important tl aprendimënt permanënt. Le panorama educatif ladin é impegné tresfora da mioré la conescënza y l’insegnamënt di lingac, ciaran porchël ince da favorí tres indô le confrunt cun les atres realtés dl’Europa”.
L’Intendënta dles scores ladines, Edith Ploner dij che:“Le svilup y mioramënt dles competënzes plurilinguales te vigni livel de scora é un di fins prinzipai dl sistem formatif ladin, por chël che al vëgn lauré te na maniera ampla se confrontan ince cun d’atri sistems scolastics. La poscibilité de confrunt danter scolines svedejes, croates, talianes y ladines deura ales maestres prospetives nöies y dá imulsc nüs por na reflesciun sön nosta maniera de insigné i lingac.”
Por nen savëi deplü cliché chiló.
USP/USP
