Atualità
Scora ladina: Insegnamënt en presënza y regoles de segurëza
L’assessur, l’intendënta y la direturia dl ITE Raetia á presenté les mosöres por le scomenciamënt dl ann de scora dai 7 de setëmber inant.
Garantí la segurëza plü alta y impó na normalité scolastica: Chësc é l’obietif dles trëi intendënzes scolastiches provinziales por ci che reverda le scomenciamënt dl ann de scora dai 7 de setëmber inant. Les mosöres spezifiches por ci che reverda les scolines y les scores ladines é gnüdes presentades incö jöbia, ai 20 de agost, dal assessur por la scora ladina adöm al’Intendënta y ala direturia dl’Istitut Tecnich Economich Raetia a Urtijëi.
“Por le scomenciamënt dl ann de scora él fondamental da garantí sides la segurëza, mo ince na certa normalité y na costanza tl insegnamënt en presënza. Nosc obietif é chël da mët da jí le plü che ara vá l’insegnamënt en presënza. N ater travert é da ti dé ciamó deplü na sbürla ala digitalisaziun scolastica, por garantí le medemo azes al monn digital ales mitans y ai mituns”, á splighé l’assessur. Tles scores elementares, mesanes y altes dles valades ladines él preodü l’insegnamënt en presënza. Tles scolines él de piceres mudaziuns.
Scolines ladines
I orars de daurida dles scolines ladines sará i medemi co dan l’emergënza coronaviurs. Al restará n tëmp de entrada flessibla sciöche denant. Les mitans y i mituns podará gní acompagná ma da un n genitur o na porsona de majera eté inciariada. Por limité le plü che ara vá le risch de contaje romagnará la composiziun di grups tres la medema. Al ne é nia preodü l’adoranza dles mascores y al ne sará degun limit de destanza da respeté. Les mitans y i mituns messará se lavé gonot les mans.
Les scolines é arijignades ca por respogne te na manira asvelta a caji eventuai de contaje. Sce al ess da gní a se le dé infeziuns, gnarál tut les dezijiuns localmënter adöm cun le Sorvisc de Igena y Sanité Publica, la direziun dles scolines y le Comun. Chësc ó dí che n caje de infeziun da covid-19 te na scolina portará bunamënter y aladô dla carantena scrita dant dales autorités, ala stlüta temporala dla scolina. Tl caje che n möt o na möta áis sintoms tratan le de gnarál atira despartí dai atri por döt le de. Al gnará avisé i geniturs che gnará a se do le möt por na vijita dal pediatra o dotur de ciasa.
La regola é chëra che al mëss sté a ciasa düc i mituns y adulc che é te carantena, che á na temperatöra sura i 37,5° y che mostra sintoms che fej riferimënt al Covid-19. Chësc ne vel nia por na strüscia o desfridada sce i mituns o l’adult se sënt bun. Al ne pó nia jí ite te na scolina mituns o adulc che á albü contat ti ultims 14 dis cun na porsona positiva.
Scores elementares y mesanes
Por smendrí le plü che ara vá le risch de infeziun él preodü entrades y sortides desfarëntes, olache al é poscibl. Al é d’oblianza por les scolares y i scolars da se curí bocia y nes canche an röia te scora y canche an sun vá a ciasa. Ti porti de scora él ince d’oblianza de se curí bocia y nes sce la destanza é demanco co un n meter. Tratan l’insegnamënt de classa sará la destanza di banc almanco de n meter, porchël pó dailó la mascora gní tuta jö. Sce valgügn á na temperatöra sura i 37,5° mëssel sté a ciasa y cherdé n dotur. L’assessur y l’intendënta fej n apel ai geniturs da mëte instësc averda ala situaziun sce n scolar o na scolara ess da jí a scora cun la strüscia o na desfridada.
Tles scores elementares y mesanes él preodü l’insegnamënt en presënza danmisdé y domisdé cun plü o manco l'orar da denant che vigni scora comunicará chisc dis ales families. Al gnará te vigni moda renforzé le laur didatich por n aprendimënt autonom y les competënzes digitales, ince poriva che sce al ess da gní a se le dé situaziuns de carantena.
Scores altes
Tles scores altes ladines vëgnel garantí l’insegnamënt en presënza. Al ti gnará ince pité ai scolars y ales scolares la poscibilité da recuperé la pert d’insegnamënt nia fata tratan la perioda de stlüta.
Mensa
Vigni comun dles valades ladines á dé süa desponibilité da organisé na marëna sciöche i atri agn cun dötes les normes de segurëza ajuntives che messará gní respetades.
I podun porchël dí che la scora ladina pó pié ia cun na buna situaziun de scomenciamënt por scolares y scolars y sües families por i numeri che pormët l'insegnamënt en presënza deplëgn.
Scolines y scores ladines: 3.094 iscriziuns
Indöt é scrites y scric ite 3.094 mitans, mituns, scolares y scolars na scolina y scora ladina. 712 mitans y mituns jará te öna dles 17 scolines dles valades ladines, 1158 scolares y scolars jará tla scora elementara ladina y 680 te na scora mesana ladina. Tl ann de scora 2020/21 sarál 505 scolares y scolars che frecuentará na scora alta ladina y 39 la scora profescionala Cademia.
USP/rc
