Atualità
Sciüri tradizionai: sëgn ince da ascuté te na mostra digitala
Da incö él poscibl da odëi, ascuté y lí online sciöche ai vëgn fac i sciüri cun la scorza di lëgns, ci sonn che ai á y á ci tradiziuns che ai é coliá.
“Maienpfeife”, “Moidnpfeife”, “Sifoloti”, “Sciüri”, “Wischpile” y “Fenfa” é ma n valgügn di inoms de chisc stromënc: i Sciüri o Maienpfeifen é stromënc che plüdadî fajô pert dl monn di famëis; aldedaincö vëgni snizlá datrai n iade o aposta por manifestaziuns da chëres porsones che se recorda ciamó sciöche an fej. Da incö él poscibl da vijité na mostra digitala sön le portal dles scores de musiga dla Provinzia. Al é da odëi de plü videos che mostra sciöche i stromënc vëgn realisá. Implü vëigun ince les porsones che i fej, sciöche ai sona y a ci tradiziuns che ai é coliá. Tl zënter dla mostra online él i 19 videos etnografics cun sottitui ince por ladin, todësch y taian. Implü él da odëi 29 ogec y materiai, danter l’ater ince fotografies y n catalogh de stromënc.
Proiet d’inrescida
Döt chësc é le resultat de n proiet d’inrescida dal titul “Maienpfeifen in Südtirol”. Al á lauré para le espert de musiga Paolo Vinati tl 2019 por cunt dla seziun de musiga popolara dla Direziun provinziala Scores de musiga ladines y todësces. I stromënc é gnüs metüs a desposiziun dala seziun musiga popolara. Deache i stromënc é fac de material vegetal soni ma por na perioda cörta de tëmp.
Cartina interativa online
La metüda onlina de chësta mostra é gnüda fata dala Informatica Alto Adige (SIAG). Dlungia i video pon ince ti ciaré a na cartina interativa. Le contribut scientifch é dl espert Paolo Vinati.
Le video por ladin é da ciafé chiló: https://scoresdemusiga.provinzia.bz.it/musiga-popolara/maienpfeifen/rina-welschellen.asp
USP/gst/ma
