Atualità
#multilingual: Provinzia y monn dl'economia sostëgn le plurilinguism
Cun na campagna de sensibilisaziun él rapresentanc dl monn dla cultura y dl’economia che sensibilisëia por na cosciënza publica por la sozieté plurilinguala dl Südtirol.
Sprichst du LUCHSISCH? Parli ZEBRESE? Baieste CAMALEONESC? Cun chëstes domandes dess la conescënza y la sensibilité di zitadins sön la tematica dl plurilinguism gní ampliada. Söi cin' placac realisá por l'ocajiun él ince bele lapró la resposta: “Nos gnanca ne. Mo tröc d'atri lingac.” La scomenciadia dess descedé interes y porté spo ala plata internet dla campagna de sensibilisaziun #multilingual (www.provinz.bz.it/sprachen). Tres la campagna dessel ti proscimi trëi agn gní lié adöm scomenciadies, proiec y mosöres por motivé jogn y jones da imparé de plü lingac.
Plurilingusim: richëza y valur implü
“Capí y baié de plü lingac é na cossa prësc naturala aldedaincö. Dantadöt nos ladins gnun bele da pici insö en contat cun de plü lingac y conesciun insciö dër bun düc i vantaji dl plurilinguism”, dij l’assessur por la scora y cultura ladina Daniel Alfreider. “I orun insciö motivé düc y dötes da se anuzé dla poscibilité da imparé de plü lingac, deache conësce atres cultures ó dantadöt dí se arichí personalmënter”, insciö Alfreider.
“Da agn él le Consëi d’Europa che sotlignëia l’importanza che i zitadins europeics sides bugn da rajoné te almanco dui lingac y lapró tl lingaz dla uma. Mo atualmënter él ma te püces regiuns d’Europa chësc standard”, ajuntëia l’assessur por la cultura todëscia Philipp Achammer. “I viun te na tera cun trëi lingac, olache le plurilinguism é na condiziun naturala y i messun anuzé chësta ocajiun”, sotlignëia Achammer.
Conësce tröc lingac: important por economia y turism
Ince por l’assessur por la cultura taliana Giuliano Vettorato é le proiet #multilingual n “arichimënt sides personal mo ince por döta la coletivité. Le plurilinguism nes pormët da incunté porsones da seturs cultruai desvalis cun la poscibilité da amplié nüsc traverc y nostes conescënzes. “Tl monn globalisé da incö é le conësces deplü lingac na cossa naturala”, dij le presidënt dla Ciamena dl Comerz de Balsan Michl Ebner, che recorda che le conësce de plü lingac y cultures deura ince poscibilités nöies tl comerz y te marciá nüs.
Un di seturs, olache le plurilinguism á n gran valur é le turism. Chësc aspet sotlignëia Marina Rubatscher Crazzolara che é la presidënta dl Comité dles imprendituries dla Ciamena dl Comerz da Balsan. “Le plurilinguism ne á nia ma vantaji por suranstantes y suranstanc o por aziëndes che laora a livel internazional, mo por vigni colaboradú dl setur. Sce i ghesc röia te n post olache ai se stá saurí deache ai conësc le lingaz, spo vëgni plü ion indô n iade”, insciö Crazzolara. Hannes Mussak, presidënt dl Südtiroler Wirtschaftsring – Economia Alto Adige, é dla minunga che le plurilinguism é n valur por avëi suzes tl monn dl laur tl Südtirol y foradecá.
Le program dla campagna de sensibilisaziun
Da chisc pinsiers él nasciü l'idea da colaboré danter les istituziuns por la campagna de sensibilisaziun. Sot al logo #multilingual gnarál ti proscimi trëi agn lié adöm scomenciadies, proiec y mosöres che se tol dant da promöie le plurilinguism. Danter l'ater él preodü
- Practicums aziendai y linguistics tl'aministraziun provinziala: les scolares y i scolars dla scora alta á la poscibilité da combiné te na manira mirada so practicum cun so secundo lingaz, ciaran da le fá te n ofize provinzial olache al vëgn dantadöt adoré sciöche lingaz de laur so secundo lingaz.
- Concurs por la jonëza "Da n lingaz al ater zënza fadia": cina la fin d'agost podô les jones y i jogn porté dant sües idees por ti trasmëte a jënt dla medema eté l'entusiasm por i lingac y ti fá capí l'importanza dl multilinguism. N grup de cin' mitans de Passeier á davagné le pröm pest y pó a realisé süa idea cun le sostëgn profescional.
- Event-lingac 2021: la Ciamena dl comerz deboriada cun la Provinzia, le Südtiroler Wirtschaftsring – Economia Alto Adige y les rapresentantes y i rapresentanc di scolars y studënc programëia n event de lingac por sensibilisé la jënt por chësta tematica y mostré sö tan important che le plurilinguism é tla vita (profescionala) y ci ofertes che al é danman por imparé lingac.
Por de plü informaziuns: www.provinz.bz.it/sprachen
USP/jw
Galaria dales fotografies
