Atualità
Scores ladines y todësces: Les infeziuns nöies é aumentades
Tl'edema passada él gnü registré 2 caji de infeziun da Sars-Cov-2 tles scores ladines y indöt 119 caji de infeziuns tles scores todësces.
Tl Südtirol él le numer dles infeziuns da coronavirus che é en aumënt y insciö ince le numer di caji de isolamënt. Indöt 121 caji de infeziuns él gnü registré tla edema passada tles istituziuns de formaziun todësces y ladines. Chisc dac él i Departimënc scolastics ladin y todësch che á mené inier (26 de otober) al Ministere por l’Istruziun (MIUR) a Roma. I dac fej referimënt al’edema da en lönesc (19 de otober) cina en domënia (25 de otober) y reverda caji de döt le monn dla formaziun, chël ó di mitans, mituns, scolares y scolars, colaboradësses pedagogiches y colaboradus pedagogics, insegnantes y insegnanc y personal tles scolines y scores.
Scores y scolines ladines: 2 caji de infeziuns nöies
Tles scores ladines él gnü registré l’edema passada 2 caji de infeziuns nöies da Sars-Cov-2 tles scores ladines che á ince porté spo a 10 caji de isolamënt. Al se trata de un n caje te na scora elementara y de un n caje te na scora alta. Implü él 4 caji de carantena tles scores elementares, un n caje tla scora mesana y cinch caji tles scores altes.
Scores y scolines todësces: 119 infeziuns nöies
Por ci che reverda les scores todësces él 119 caji de infeziuns nöies, de chisc 37 che reverda les scores elementares, 33 che reverda les scores mesanes, 33 che reverda les scores altes y 7 les scores profescionales.
Porvia di caji de infeziuns él indöt plü de 1000 caji de isolamënt. 162 caji de isolamënt él gnü stabilí tl’edema passada tles scolines, 231 tles scores elementares, 412 tles scores mesanes, 278 tles scores altes y 40 tles scores profescionales.
USP/jw
