Atualità
Dala Junta: Le sostëgn economich por astistes y artisć vëgn alzé
La Provinzia de Balsan á alzé le contribut por artisć profescionisć lëdi da 2000 a 3000 euro. Al é ciamó tëmp cina la fin dl ann por fá la domanda de contribut.
Les limitaziuns ala vita culturala gaujades dal coronavirus á albü conseguënzes negatives por tröpes artistes y tröc artisć de Südtirol. La Junta provinziala á porchël, sön proposta di assessurs por la cultura Daniel Alfreider, Philipp Achammer y Giuliano Vettorato, metü adöm de messé n pachet de mosöres de sostëgn por les artistes y i artisć profescionisć lëdi. Cina la fin de setëmber â les artistes y i artisć de düc i ciamps podü dé jö süa domanda de contribut straordinar de 2000 euro, lié al coronavirus, pro les Repartiziuns culturales. Por ciafé n contribut messân ester atifs te Südtirol tl ciamp artistich da almanco dui agn y ne avëi nia n contrat de laur dependënt de plü co dodesc ores al’edema. I artisć messâ ince avëi da mostré sö almanco dui proiec publics al ann.
Mantigní la creativité culturala
Cun chësta delibera ne vëgnel nia ma alzé le corona-bonus por artises y artisć lëdi che á bele fat domanda, mo al sará ince poscibl da fá domanda por dötes y düc chi che ne l’á nia ciamó fat y chësc cina la fin dl ann. L’assessur por la cultura ladina Daniel Alfreider á sotligné che al é gnü metü da jí de plü scomenciadies culturales tratan le tëmp de emergënza, ince porvia dl sostëgn dla Provinzia. “Chisc proiec ne pó nia baraté fora les ativités culturales da denant y porchël él important da mantigní döta la creativité culturala dantadöt ince por le dagní”, insciö Alfreider.
Contribut alzé de 1000 euro
„Tröc artisć y artistes patësc por les conseguënzes dles mosöres cuntra le coronavirus, dantadöt por les proibiziuns dles manifestaziuns y por i salfs de teater, de conzert y de chino, che é stlüc“, á dit l’assessur Philipp Achammer. Porchël ál incö porté ite te Junta provinziala, adöm ai colegs Alfreider y Vettorato, la proposta da alzé da 2000 a 3000 euro le contribut straordinar por i artisć lëdi lié al coronavirus. La delibera é gnüda aprovada al’unanimité. L’assessur por la cultura taliana Giuliano Vettorato sotlignëia inant: “Insciö él poscibl da sostigní les artistes y i artisć, ince por garantí la pluralité dles ativités culturales de Südtirol."
Domandes cina ai 31 de dezëmber
Dötes les artistes y düc i artisć ciafa che á fat domanda ciafa insciö n aumënt de 1000 euro tres l’aministraziun provinziala. Artistes y artisć profesionisć lëdi de düc i seturs podará fá domanda cina ai 31 de dezëmber dl 2020 pro i ofizi dla cultura competënc por chësc sostëgn. Al ne pó nia fá domanda studentës, studënc y seniors.
USP/jw/tl
