Atualità
Cultura y jonëza ladina: 2020 en döt 1,27 miliuns de Euro de contribuc
Tl ann 2020 á l’Ofize Cultura ladina y Jonëza dl’Aministraziun provinziala de Südtirol dé contribuc te na soma de 1.271.847 Euro.
Tl ambit dla cultura y jonëza ladina á l’Ofize Cultura ladina y Jonëza dl’Aministraziun provinziala tl ann 2020 dé contribuc te na soma de en döt 1,27 miliuns de Euro.
"Les ativités artistiches y culturales, mo ince le laur cun i jogn, patësc dassënn la crisa dl Coronavirus, por gauja dles tröpes limitaziuns", dij l’assessur por la cultura Daniel Alfreider. Nia ma dal punt d’odüda finanziar, mo ince por ci che reverda la vita dles uniuns y dla comunité é chësta pandemia n gran pëis. Mo impó á les organisaziuns di jogn, i artisć y les uniuns culturales lauré cun tröp impëgn y tröpa responsabilité te chësc tëmp tan particolar. I orun porchël ti jí incuntra ai bojëgns de döt le panorama cultural y lauré inant por le sostigní cun les mosöres de promoziun y de sostëgn“, insciö l’assessur.
Cultura ladina: 938.455 Euro de contribuc
Tl ambit dla cultura ladina é i contribuc 2020 te na soma de 938.455 Euro partís sö insciö: Ativités culturales y proiec te na soma de 165.497 Euro, publicaziuns te na soma de 117.418 Euro, ativités de carater educatif te na soma de 939 Euro y investimënc culturai te na soma de 107.500 Euro. N gran suzés á albü tl 2020 le concurs leterar "Scribo", che é sté na forma particolara de promoziun de operes leterares por ladin y porchël ince dl lingaz ladin instëss.
L Istitut cultural Micurá de Rü á ciafé por le laur istituzional n contribut de 457.900 Euro. Na particolarité dl ann 2020 é sta i contribuc straordinars por le Corona por artisć lëdi y artistes lëdies. Chisc é gnüs metüs a jí dala Junta provinziala por rinforzé le monn dla cultura. Chisc contribuc á fat fora n import de 89.200 Euro.
Jonëza ladina: 333.392 Euro de contribuc
I contribuc tl ambit dla jonëza te na soma complessiva de 333.392 Euro se spartësc sö insciö: Ativités por la jonëza te na soma de 313.392 Euro y investimënc por la jonëza te na soma de 20.000 Euro. N gran suzes á albü i proiec "JABA" y "JAWA": chiló á i jogn y les jones dai 13 ai 19 agn albü la poscibilité de daidé fora te istituziuns publiches desvalies tles valades y da fa insciö na esperiënza fondamentala tl monn dl laur.
En chëst’isté a gauja dl virus n’á les istituziuns joniles "Sorvisc ai jogn Val Badia" y "Nëus Jëuni Gherdëina" nia albü n laur saurí. Al é sté n gran laur da reorganisé l’ativité "Isté deboriada" cun pici grups y limitaziuns dl program de mituns y mitans tignon cunt de dötes les mosöres de segurëza preodüdes. Te chësc tëmp particolar é ince stades tröpes les iniziatives online, olache tröc á partezipé a referac y propostes por ativités te familia. I jogn y les jones á ince ciafé n gran aiüt dal personal spezialisé che laora ti zëntri che ti é sté dlungia ti momënc plü ziti. Düc chisc proiec y iniziatives é jüs adincuntra ai debojëgns dla jonëza y dles families.
"Ince sce le 2020 é sté n ann scialdi rî por l’ambit cultural, la jonëza y le volontariat, á les istituziuns culturales, les lies, les organisaziuns por la jonëza tles valades ladines desmostré de éster sta bugn da reagí snel y de na forma creativa ales desfides nöies", dij la direturia dl Departimënt Intendënza y Cultura ladina Edith Ploner. "Sciöche istituziun dl’Aministraziun provinziala che se crüzia dles chestiuns ladines sun contënc de podëi dé n suport finanziar a chëstes iniziatives – n trú che jarún inant tl interess dla cultura y jonëza ladina."
USP/san
