Atualità
Istitut Culturel Ladin Micurá de Rü: Cunsëi d'aministrazion nuef
Tla prima senteda dl Cunsëi d'aministrazion dl Istitut Ladin Micurá de Rü de n vënderdi ie Elmar Castlunger unì lità presidënt y Monika Senoner vizepresidënta.
L Cunsëi d'aministrazion dl Istitut Ladin Micurá de Rü - metù adum da Elmar Castlunger, Monika Senoner y Giorgio Costabiei - ie unit istituì da nuef cun deliberazion dla Jonta provinziela n. 273 di 23 de merz 2021. N vënderdi ai 26 de merz tla prima senteda dl cunsëi iel unit lità si presidënt y vizepresidënta.
L Istitut Ladin Micurá de Rü cun sënta a San Martin de Tor à l duvier de studië a livel scientifich l lingaz, la storia y la cultura di ladins dla Dolomites. L Istitut ladin ie l zënter de cumpetënza per l ladin davia che l ie nciarià dala Jonta provinziela de normé l ladin scrit dla Val Badia y Gherdëina. "L Istitut ie una dla seves plu mpurtantes per mantenì y svilupé la rujeneda y cultura de nosta mendranza. L dà mpulsc mpurtanc per si svilup y porta danter i zitadins y la zitadines cunescënzes y nrescides nueves sun nosta cultura", sotrissea l assessëur Daniel Alfreider. L Istitut culturel ie oradechël na luegia de dialogh cun d'autra mendranzes linguistiches. "De mpurtanza ie la culaborazion cun d'autra istituzions cultureles y lueges de furmazion, dantaldut canche la va de scumenciadives plu amples", dij l assessëur.
Sun proposta dl assessëur à la Jonta provinziela ai 23 de merz 2021 numinà l cunsëi nuef dl Istitut Micurà de Rü. L cunsëi d’aministrazion se cruzia dla gestion ordinera y straordinera dl Istitut. Danter si funzions plu mpurtantes ie apurvé l program de atività anuel, apurvé l budget economich y d’investimënt, la corezions y mudazions eventueles dl budget, sciche nce l bilanz consuntif, nominé la Comiscion culturela y sun si pruposta l presidënt / la presidënta y n si sostitut /na si sostituta.
Tl cunsëi nuef ie Elmar Castlunger l reprejentant dla Jonta provinziela, Monika Senoner la reprejentanta dl sistem scolastich y Giorgio Costabiei l reprejentant di chemuns. Tla prima senteda de n vënderdi ie Elmar Castlunger unì lità presidënt y Monika Senoner vizepresidënta. L Assessëur ti mbincia n bon lëur y truepa sudesfazion a dut l Cunsëi d’aministrazion che resta nforza per i proscimi trëi ani.
USP/red
