Atualità
Cultura: Nü miliuns de euro por pié indô ia
La Provinzia á stabilí n pachet de mosöres de nü miliuns de euro por ti dé impulsc ala cultura por pié indô ia. I assessurs Alfreider, Achammer y Vettorato á presenté incö i detais dles mosöres.
La cultura y l’ert é na pert fondamentala de nosta vita, n setur fondamental por nosta sozieté y por düc trëi i grups linguistics dla Provinzia. Por sostigní che les ativités culturales pois indô pié ia él la Provinzia che á preodü n plan cun mosöres cun cinch linies de aziun. I assessurs competënc tl ciamp dla cultura Daniel Alfreider, Philipp Achammer y Giuliano Vettorato á presenté incö ai 16 de aurí te na conferënza stampa i detais dles mosöres.
Le pachet é gnü aprové en mertesc ai 13 de aurí dala Junta provinziala y prevëiga n import complessif de nü miliuns de euro. Danter les scomenciadies preodüdes él preodü na sovenziun straordinara a düc i artisć y artistes de dötes les categories y de düc i grups linguistics de 5.000 euro. Le plann prevëiga implü scomenciadies por fá indô pié ia les ativités culturales, contribuc por les organisaziuns culturales che á pordü entrades o davagns porvia dla pandemia. Implü él ince preodü sovenziuns por les organisaziuns y por i ënc che fej investimënc, sciöche por ejëmpl tl svilup dles ofertes culturales digitales o tl’atuaziun de mosöres de sigurté cuntra la defujiun dl Covid.
Al vëgn implü ince sostigní le volontariat cultural. Le dërt da presenté domandes á lies de volontariat che renforza la vita culturala locala de n comun organisades te grups sciöche por ejëmpl cors, musighes, teatri, grups de musiga poplara y de bal poplar. N documënt cun i detais dles mosöres é gnü injunté.
L’assessur por la cultura ladina Daniel Alfreider á sotligné le gran impëgn da fá indô pié ia les ativités culturales en presënza. “I messun mët en pratica vigni mosöra por podëi scomencé cun les ativités en presënza. Le govern á bele confermé che al sará poscibl da ti ciaré ales partides dl palon dl Europeo a Roma cun na presënza dl 25 porcënt de spetadus y chësc se damanunse ince por le setur cultural. Al é gran ora da stabilí diretives concretes sön co che les manifestaziuns pó gní fates d’isté y da d’altonn.”
L’assessur por la cultura todëscia Philipp Achammer á recordé che la pandemia á smendri de cotan la vita culturala y artistica en presënza. “La cultura á la nezescité da pié indô ia y de prospetives nöies y tl mëis de ma sarál poscibl da pié indô ia cun les ativités. Le pachet aprové incö contëgn sovenziuns por sostigní l’ert y la cultura sciöche seturs economics te chi che al laora tröpes porsones”.
Por l’assessur por la cultura taliana Giuliano Vettorato él important che ince les assoziaziuns culturales che se fistidiëia di jogn y les biblioteches pois indô lauré sciöche denant. “Al ne sará nia saurí mo i sun sigü che man man sarál poscibl da daurí tres deplü”, insciö Vettorato che á rengrazié i colegs Achammer y Alfreider por la buna colaboraziun.
USP/rc
Galaria dales fotografies
